Argentina chuan nizan khan international friendly khelhin captain Lionel Messi-a goal nga hmangin Estonia 5-0 zetin an sawp. Portugal pawhin team tha Switzerland si li faia hnehin an captain Cristiano Ronaldo chuan goal hnih a thun a, a record neih mek khumin international goal 117 a nei ta bawk.

Ballon d'Or tum sarih dawng tawhtu kum 34 mi hian a thiam zia lan tirin Estonia laka Argentina goal neih zawng zawng hi ama thun vek a ni. Tun hnai chu Messi hi ram tan a chetha thei hle a, kar hmasa lawk pawh khan Finalissima nen an inkhelh tumin man-of-the-match atan a thlan a lo ni tawh. 

Messi hian minute 8-na lekah penalty atangin goal hmahruai a khung a, minute 45, 47, 71 leh 76-ah te goal thun chhunzawm lehin goal nga teh meuh a thun. Tihian ram tan goal 86 nei tawhin international goal thun tam lama palina Hungary legend Ferenc Puskas chu goal hnihin a khum a, palina dinhmun a hauh chho. A hmaah hian a ni aia goal thuma thun tam zawk Malaysia forward hlui Mokhtar Dahari awmin pahnihnaah goal 109 neitu Iran pa Ali Daei a awm a, pakhatna Cristiano Ronaldo erawh sang fal deuhin nizana a goal hnih khung nen goal 117 a nei tawh a ni. 

Paris Saint-Germain forward hi international match-a senior level-ah European Cup emaw Champions League-a game khata goal nga nei thei player awmchhun a ni nghe nghe. Kum 10 hmalam khan Champions League last 16 second leg, Camp Nou-a an khelh tumin Barcelona-in Bayer Leverkusen chu 7-1 zetin an sawp a, hemi tum hian Messi hian goal nga zet alo thun tawh bawk a ni. 

Nizan vek khan Portugal pawhin team tha Switzerland si li faia an hneh tumin an captain Cristiano Ronaldo chuan goal hnih a contri ve a, international goal thun tam ber record a neih mek chu amah vekin khumin international goal 117 a nei ta bawk. Khum a harsa ve tawh viau maithei.   

Ronaldo goal thun hi first-half chhunga a thun ve ve niin pakhat zawk phei chu free kick hmanga a thun a ni. Switzerland lamah hian William Carvalho leh Joao Cancelo ten an thun ve bawk. Ronaldo hian hat-trick siamna hun tha neiin, ti goal ngei tawh tura a lan laiin yard ruk lek atangin a hlah hlauh a ni. 

Switzerland hi Qatar World Cup khel tura an inpet tlin tawh hnu hian an che fuh hleithei lo va, match an khelh hnuhnung pali-ah an la tlawm vek a ni. Ningani khian Portugal hian Czech Republic an mikhual ve leh dawn a, Geneva lamah Switzerland leh Spain an inhmachhawn bawk ang.