UK prime minister meuhvin St Mary’s Stadium-ah tawiawm mah se Southamton chu an him zo ta lo va, khelh hnih hmabak la nei chungin Premier League atangin an tla tih a chiang ta.

Saints hian Inrinniah zanah Fulham mikhualin an chak loh chuan an tla dawn tih hre sain an khel a, inham tan hram tumin bei hle mah se an tlin ta lo va, second half-a goal hnih an chhuah hmangin si hnih faiin an chak lo.

Mikhual tan hian Carlos Vinicius chuan second half tan deuh chiahah goal hmahruai a thun a. Referee Chris Kavanagh a nam avanga vawi riat zet inkhel thei lo tura hrem, Aleksandar Mitrovic chu inlan leh thei chiahinbench atanga lutin minute 78-ah an goal hnihna a thun belh zui a ni.

Southamton hi kum 11 zet Premier League-ah an lo awm tawh a, tun season erawh a tir phat atangin an talbuai nghal a, manager pawh vawi thum an thlak a. A tawpah Ruben Selles chuan an tum hlen zo lo thovin season a kharpui a ngai dawn ta a ni.

Cottagers laka an tlawm hi vawi 36 an khelh tawha vawi 24 an chak lohna a ni a. Vawi ruk chiah hnehna changin vawi ruk bawk an tumpuite an hnehtawk a, point 24 chiah an la hmu a ni.

Khelh 36-ah hian goal 66 chhuahin goal 31 an thun a. An aia goal thun tlem hi Wolves chiah an awm a, goal 30 an thun tawh a; mahse, anni hian goal an chhuah tlem zawk avangin goal difference-ah chuan Saints aiin an tha zawk thung.

Southamton aia goal chhuah tam hi club pathum an awm a, tlahniam thei dinhmuna ding ve mek tho, Leeds United-in goal 71, Nottingham Forest-in 67 leh Bournemouth-in 69 an chhuah bawk a; mahse, heng team-te hian Saints aia goal an thun tam zawk vek hlawm avangin goal difference-ah an tha zawk vek bawk.

Inrinni zanah hian chak ngei ngei ngai dinhmuna ding leh an lo khelh tawh danah an him beiseiawm loh sa an nih avangin an khelmualah hian thutna awl pawh a tam viau va. A entu kalkhawmte pawhin an khelh laia an au el nasat bakah inkhel a tawp meuh chuan ‘kha kawr (an jersey) ha turin in-fit tawk lo’ tiin coach leh player an ti-el nasa zui hle.

Lawng chawlhna khawpui, Southamton-a piang leh sei lian, Prime Minister Rishi Sunak-a’n a tawiawm meuh pawhin goal lawm tur an chhawpchhuahsak thei lo va, an him zo ta lo a ni ber mai.