ZALEN Sept. 2, 2025: India ram Prime Minister Aizawla lo zin tur inbuatsaihna atan vawiin chawhnu khan Aizawl Municipal Corporation (AMC) a thawktute chuan Chaltlang leh Chanmari venga kawngpui leh a chhehvel tihfai hnatlang an nei.

Hnatlang hi Aizawl Mayor Lalrinenga Sailo leh Municipal Commissioner Joseph H. Lalramsanga hoin an nei a, kawngsir hnim te sam faiin, railing bal te an silfai a. A hmaa lo tihfai tawh Dawrpui leh Zarkawt venga retaining wall rawng hnawih hna te an thawk bawk a ni.

India ram Prime Minister rawn zin tur atana inbuatsaihnaah khawpui Sorkar AMC hi faina Thuampui Helipad leh Lammual inkar kawngpui leh Lammual faina leh mawina kawngah mawhphurhna pek a ni a. Kar hmasa, August ni 26, 2025 khan he kawngpui kara Local Council 14 te chuan hnatlang koin kawngpui leh a chhehvel leh tuiluan kawr tihfai hna an lo thawk tawh a, inrinni khan Lammual bawlhhlawh thenfai hna thawh a ni bawk a ni.

AMC chuan August ni 27, 2025 khan thu chhuahin, India ram Prime Minister in Aizawl a rawn tlawh dawn avangin Thuampui Helipad atanga Lammual inkara kawngpui (via Chaltlang leh Ramhlun) leh a chhehvela bungraw dah hnawk ten September ni 5, 2025 ral hma ngeiin senghawi vek turin a hriattir a. Insakna bungrua hrang hrang – Iron rod, balu, rawra, etc. kawng kama dah zawng zawng ten senghawi vek tur te, Workshop hrang hrang leh dawr siam ten an hmunhma ti fai tur leh an bungruate dawr chhunga senglut vek tur te in a hriattir tawh bawk a ni.

Heng bakah hian AMC chuan VVIP in a paltlang tura office te pawh an hmunhma tifai turin a ngen bawk.

#ZalenNews