Aizawl: Pradhan Mantri Gram Sadak Yojana (PMGSY) hmangin Mizoram khua 169 tlawh tir a ni tawh. Mizoram PWD hotu ten ziak Press mite an hrilh danin PMGSY hmang hian kawng laih zawh tawh (formation cutting) 1756.90 km a awm tawh a, black topping tih zawh tawh 578.74 km awmin Rs. nuai 78082.64 hmanral a ni tawh a. He kawnglaih hian khua 171 tlawh tura tih anih laiin khaw 169 a tlawh a ni. PMGSY hian a tum ber chu thingtlang khuaa mihring cheng 500 chin (phai ram tan) leh 250 chin (tlangram tan) te chu motor kawng thaa tlawh tir vek a ni. He programme hi August ni 15,2000 khan India Prime Minister chuan a puang a, India ramah hian thingtlang khua 8,25,000 vel a awm a, chung zingaa khua 3,70,000 chu kawng tha in a la pawh loh a ni. Mizoram ah chuan kum 1991 chhiarpui angin khua 795 awm zingah khaw 363 chu kawng tha in a la pawh loh nia chhut a ni. PMGSY hnathawhna sum hi a tirah chuan central tum vek a ni a, mahse kum 2015-16 atangin a kalphung hi tih danglam a ni a, 100% central funding ni thin chu 90:10 ah siamthat a niin central in 90% leh state in 10% a tum ve thung.