Thingtlang khua kawngpuiin a la tlawh pawh that loh ten kum tluana zawh tlak an neih theihna tura sawrkar laipui hmalakna, Pradhan Mantri Gram Sadak Yojana (PMGSY) hi kawng tha neihna mai piah lamah rethei chawikanna tura hmalakna a ni a, hei hi India ram hmun hrang hrangah kalpui mek a ni. Mizoramah PMGSY kawng laih mek te chu Central YMA chuan tun hnai khan an endik a, kawng laih a nih danah lawmna tur an hmu tam lo hle niin a lang.

PMGSY kawng laih hi a hlawk tia sawi thin a ni a, contract dang te nena khaikhin pawhin hlep a sang bik hle niin a lang. Central sawrkar hian kawng laihna atan bik hian hlep hi a tihsan em em a rinawm loh a, tehfung tha tak hmangin contractor te hlep tur hi a siam ngei a rin-awm. Chuvangin thil chiang taka lang chu kawng laitu contractor te hian a nih tur angin an lai lo ni a ni ber a, kan khawkar kawng tam tak fur laia zawh tlak a ni lo thin te hian a ti chiang viau.

Tun hnaia CYMA ten hmun hrang hranga zirchianna an neih atanga a lan danah phei chuan contractor hming hawha hna thawk tam tak an awm tih a hriat a, heng ho hian an hna hi an tlin tawk lo tih pawh a chiang viau. Hnathawk tha mang si lo a running bill an la thei reng mai te hian ngaihtuah a ti thui bawk a, an sum lak tawh leh hnathawh inmil lo tam lutuk chu tlawmngai pawl te rilru tinatu a ni a, a tuartu chu mipui bawk an ni.

CYMA leh PWD te inkawmna atanga contractor leh an hming hawhtute inkar chungchanga thutlukna ang deuh awm pawh hian ngaihtuah a ti tam hle a, hming hawhtute ten hna an thawh that miau loh chuan a hming neitu pawh hi hrem mai tur ni awm tak anih laia hrem an ni lo thin hi a pawi tak zet. A chhan chu hming inhawhsak man hi inpek a ni thin tlat a ni.

Mi tlem zawkin hlawkna an duh avanga mipui tam zawkin kan tawrh hi a dik lo a. Kum tluana chak lakna kawnga hman a nih theihna atana tih ni si a, hman tlak mang lova siam a nih chuan PMGSY hian a tum a thelh thak tihna a ni ang. Tuna hemi hnuaia hna thawk mek hi March 2021-a zawh fel tur a ni a, zawhfel a nih loh chuan a tuartu tur chu mipui bawk kan ni ang.