ZALEN March 8, 2026: Sawrkar laipuiin December 1, 2025 atanga chhungkaw harsa zawk, BPL chhungkaw hmeichhiaten an chhawr tangkai tur gas connection a thlawna lak theihna tur, Pradhan Mantri Ujjwala Yojana (PMUY) scheme hnuaiah Mizorama chhungkua 1,200 vel hnenah connection pek a ni tawh.

ZALEN thudawn danin PMUY scheme hnuaiah hian India-a chhungkaw nuai 25 vel a thlawnin gas connection hi pek tum a ni a, hmarchhak bial tan nuai nga vel ruahman niin a ti hmasa piang hnenah connection hi pek tura ruahman a ni.

Gas connection hi tih mek zel niin March 31, 2026 thleng hun hawn a ni a, a zawh (full) hun tur sawi theih a la ni lo.

He scheme hnuaiah hian BPL chhungkaw harsate chu a thlawna pek zel tur niin e-KYC pawh distributor-ten an tihsak zel tura ruahman a ni.

Hetih lai hian gas connection dil zingah ration card leh Adhaar inmil lo a awm thin avangin chhungkaw eng emaw zat chuan harsatna an tawk nia thudawn a ni.

Mizoram Consumers’ Union President Thanglura chuan PMUY scheme hnuaiah hian gas connection hi pek zung zung tura tih a nih laiin a buaipuitu gas distributor-ten an thawk chak tawk lo nia an hriat thu ZALEN a hrilh.

“Gas distributor zingah tha taka buaipui an awm laiin thenkhat chuan an ti tha tawk lo hle niin kan hria a. Sawrkar leh Indian Oil Corporation lamin theihtawp an chhuah laiin chhuanlam eng eng emaw siam an awm niin kan hria a, pawi kan ti hle a ni,” a ti.

PMUY hi hmeichhia, kum 18 tling tawh, BPL card nei emaw, PMUY list-a chhungkaw harsa bik anga lang, chhungkaw khatah gas connection dang la nei lo hmeichhia ten an dil thei.

Sawrkarin Rs. 1,600 (cylinder man/deposit) a tumsak a, a hmasa ber atan gas thuk (stove) leh gas bur khat (refill) a thlawnin pek tur a ni.

PMUY hi December 1, 2025 atanga hman tan niin March 31, 2026 hnu lamah chuan system-ah a lut thei tawh dawn lo a ni.

PMUY hnuaiah Mizoramah gas connection 36,031 a awm tawh.

PMUY scheme hnuaiah hian a chuh chak chak gas connection hi pek tur a ni.