ZALEN September 23, 2025 : MSSC Golden Jubilee 44th Mizoram State Boxing Championship 2025 neih turah MIZBA in Serchhip Dist. Boxing Assn.-in Hmeichhe Boxer 3 an hruaite Championship khelh ve an phalloh avangin naktukah an Boxer zawng zawngte Lunglei atangin hruai haw vek an tum.

Serchhip District Boxing Association (SEDBA) te chuan vawiin chawhma dar 10 khan Emergency Meeting kovin MIZBA hnenah Hmeichhe Boxer 3 te hi khelh tir ngei turin ngenna lehkha an thawn nghal a, vawiin tlai dar 4 thlenga an ngenna hi a hlawhtling lo a nih chuan an Boxer zawng zawng leh R&J Official Duty te naktuk Sept. ni 24 hian hruai haw vek a, State Championship hi Boycott zui nghal an tum tih an hriattir bawk a, MIZBA in an thutlukna hi sut an tum loh avangin Serchhip District Boxing Association (SEDBA) hian an Boxer te chu naktuk Sept. ni 24 tukthuan eikhamah Lunglei atanga hruai haw vek an tum ta a ni.

SEDBA chuan September ni 23 - 26, 2025 chhung a Lunglei SAI Extension Center a MSSC Golden Jubilee 44th Mizoram State Boxing Championship 2025 neih turah mipat hmeichhiatna lam rawngkaia Boxer te a lo khawih thin avanga POCSO Case a Jail tang mek MIZBA ROC Chairman T. Lalthlengliana thlavang MIZBA-in a hauh vangin Championship khel tur Hmeichhe Boxer 3, POCSO Case file tute khelh ve hi Mizoram Boxing Association (MIZBA) in an phal lo a ni, an ti

MSSC Golden Jubilee 44th Mizoram State Boxing Championship 2025 khel tur hian District hrang hrang atangin Boxer 100 chuang an fuankhawm mek a, tukin (23rd Sept. 2025) zingkar khan Weight lak niin hetah hian Aizawl leh Serchhip District atanga hmeichhe Boxer kal ve mi 3 te chu ROC Chairman Rosema’n POCSO Case an file avangin Mizoram Boxing Association (MIZBA) chuan he Boxing Championship an khelh ve a rem loh thu hi a lo hrilh a ni, an ti.

SEDBA chuan July 2025 thlatir khan Haryana, Rohtak ah 6th Junoir (U-17) Boys & Girls National Championship khelh a ni a, heta Mizoram aiawha kal Hmeichhe Boxer 4 te hian anmahni hruaitu Mizoram Boxing Assn (MIZBA) hnuaia Ring Official Commission (ROC) Chairman T. Lalthlengliana chu Haryana a an kal chhung leh an kal hma a an Camp lai te in mipat hmeichhiatna lam hawi zawngin a khawih fo nia sawiin an nu leh pa te nen Child Welfare Comtt. ah an zualko a, chumi kalzelah chuan T. Lalthlengliana hi manin Central Jail ah dah mek a ni a, hei vang hian Mizoram Boxing Association hian T. Lalthlengliana thlavang hauhin Hmeichhe Boxer 3, Championship khel tura kal te hi khelhtir ve an phal ta lo a ni, an ti bawk.

MIZBA hian a hma pawhin Sete Boxing Academy naupang te chu he championship-ah hian tel an phal loh thu Sete Boxing Academy te hi a lo hriattir tawh bawk a ni.