Manchester United atanga Italy a pan hnuah Paul Pogba hi hliamin a tihbuai reng avangin a la inkhel mumal lo hle a, a thei veleh tan dawn chauh va; mahse, chu pawh chuan a daih rei lo, a khawngaihthlak tak zet.

April, 2022 khan French midfielder hian United tan Liverpool a hmachhawn a, hei hi inkhela bul a tan hnuhnung ber a ni a. Pathianni zan khan a vawi khat nan Juventus tan inkhel bul tantu zingah a tel veleh thei ta a; mahse, minute 24 chiah a daih leh tho.

United tana a inlan tum hian a maltê a tina a, khelh pawh a khel tluan thei lo va, season tawp thlengin a inlan zui thei lo. Nipui bazarah na nei chungin a lo khelh tawhna, Turin club a pan zui.

Serie A club tan hian season thara inbuatsaihna a inkhelhnaah Pogba hian a khup a tina leh a, zai ngai hial tur ni mah se kum tawpa Qatar-a World Cup khelh turah inlan hmana a dam loh a hlauh avangin zai a duh lo va; mahse, zai loh pawhin a lo dam har tho va, a thiante rualin MIddle East a pan ve thei ta chuang lo.

January-ah squad-ah telh theihin a dam ve ta a; mahse, a tha a chiang lo leh a, inkhel tak tak turin a la dam thei chuang lo.

Eng emaw chen a chawlh leh hnuah a vawi khat nan February 28 khan a inlan ve ta a. A khel tluang viau dawn a, March thlaa Europa League-a Freiburg an hmachhawn dawnah a nungchang avangin khelhtir loh leh a ni a, hemi hnu lawkah training-naa freekick pet a zirnaah a malpui ding lam a tihnat leh avangin a chawlh leh a ngai.

A inenkawl leh deuh hnuah April 13 khan Sporting Lisbon an hmachhawn tumin bench-ah thuttir theih a ni leh ta a, a tawp lamah reilo tê a inlan thei bawk.

Pathianni zana Serie A-a Cremonese a hmachhawn hma hian substitute bench atangin vawi kua a inlan thei chauh va, tlakhniam hlau lakah hian kum khat chuang hnuah bul tan theiin a dam ta tiin a inlan a; mahse, minute 24 lek hnuah a mal a tina leh ta tho va, engchen nge a chawlh a ngaih leh dawn hriat a ni rih lo.

A hmai hupa hrehawm ti tak chungin French international midfielder hian khelmual a chhuahsan a, “A pawi kan ti tak zet,” tiin inkhelh zawhah Juve boss Massimiliano Allegri chuan a sawi.

“Lo kir leh tur hia thil tam tak a hlan a, a bei a, hetiang a ni leh nghal hi a lungchhiatthlak tak zet,” a ti a. “Rit tak phur thei a ni a, ani tel lova kumtluana khelh hi a risk a sang em em reng a, bul a tan theih loh ringawt pawh a pawi a ni,” a ti bawk.