Aizawl February 28, 2023: Vawiin khan Central YMA Office ah Central YMA huaihawtin Uniform Covil Code (UCC) chungchangah NGO te leh Political Party hrang hrang aiawh te an thukhawm. UCC dodalna kawngah theihtawpa tanho zel tha an tih thu an sawi.  

Meeting hi Central YMA President R. Lalngheta chuan a kaihruai a, pawl hrang hrang aiawh hruaitu kalkhawmte chuan Sawrkar laipuiin India ram puma Uniform Civil Code (UCC) hman tumna a awm ni a lang chu Mizo hnam tan leh India rama hnam hrang hrang te tan a him dawn loh avangin an duh loh thu leh theihtawpa do a tul thu an sawi a. A dodalna kawngah pawh theihtawpa tanho zel tha an tih thu an sawi hlawm a ni. 

Kalkhawmte hian Resolution an siam, “Ramtuk thla (February) ni 28, 2023(Thawhlehni) chawhnu dar 2:00-a Central YMA Committee Room-a CYMA bultuma Political Party te (BJP, INC, MNF, PC, ZPM) te leh NGO hruaitute thukhawm chuan Uniform Civil Code (UCC) hman tura hmalak mekna hi kan duh lova, theihtawpa do zui zel tha kan tiin tun hi tanho hun tak niin kan hria. Kan ram, hnam leh sakhua a him zel theihnan theihtawpa tanho zel tha kan ti.” tih chu an pawm.