Aizawl May 26, 2024 : Mizo National Front (MNF) Senior Vice President Dr. R. Lalthangliana chuan, “Lok Sabha MP thlannaa Mizoram Armed Police 1,047 zette vote thlak loh chhan hi Mizoram sawrkar inthlahdah vang liau liau a ni a, ZPM sawrkar hian ngaihdam a dil ngei turah ka ngai a ni,” a ti.

Nimin khan Aizawl Press Club-ah chanchinbumite kawmin Dr. R.Lalthangliana chuan, “State pathum - Bihar, Uttar Pradesh leh Madhya Pradesh-a duty tur sipai 1,047-te hi election duty tura an tirh liam hma hian postal ballot hmanga vote an thlak theih dan tur ruahmanna siam theih a ni ngei dawn tih chiang reng chung sia vote thlak thei lo tura ruahmanna a siam kher kher hi kan police-te dikna chanvo rahbehsakna langsar tak, Mizoram election chanchina thil la thleng ngai lo a ni a. Thleng nawn tawh lo se kan duh em em a ni,” a ti.

Police-ten vote an thlak theih loh chhan chu Mizoram sawrkarin ruahmanna mumal a siam loh vang nia sawiin Dr. Thangtea chuan, “Mizoram sawrkarin ruahmanna felfai nei nise, Ministry of Home Affairs-in Mizoram Police-te election duty tura ruahmanna a rawn siam ang anga vote thlak hmaa intir liam mai lovin, kan police te hi inthlanpui vote thlak thawh thumna leh a hnu lama duty tur pawhin ruahmanna a siam theih em em dawn tih a chiang a. Hetiang ruahmanna siam ngam lo/siam nachang hre lo sawrkar kan hrawn avanga kan police officer 1074 zetin vote an thlak theih loh phah ta hi an dikna chanvo rahbeh/palzutsakna, engti zawng maha sawi fel ngaihna awm lo, thil dik lo leh Mizoram sawrkar tana zahthlak tawp khawk a ni,” a ti.

Mizoram Police hotuten an nauten vote an thlak theih loh mai hlauthawnga an theih ang anga hma an lak lain, sawrkar hotu lam atangin nawrpuina thawm hriat tur pakhatmah a awm lo niin a sawi bawk.