ZALEN October 13, 2024 : Tun sawrkar ZPM kaihhruai kal mekah police hnathawk tha lo suspend mi 59 an awm tawh a, chung zinga a tam ber chu zu ruih vanga suspend an ni.

Home department tar lan danin, kumin January atanga August thlenga police suspend mi 59 zingah hian hmeichhe pakhat a tel a, mi dang zawngte chu mipa an ni.

Suspend chhan tam ber chu zui ruih vang niin, mi 29 zet an ni a. Zu case bakah hian damdawi (drug case) vanga suspend pahnih an awm.

Heng bakah hian jail tang tichhuak pathum suspend an awm bawk a, discipline chhiat vanga suspend mi panga awm bawkin, check gate-a pawisa laa puh vanga suspend mi pahnih an awm.

Suspend dangte chu leave kal zawm huna zawm lo te, duty laia tlan bo te, duty absent te, arms & ammunition chungchang vang te, kuhva tawlhruk chungchang vang te, gas tihchingpen vang te, thil ruk vang te, roll call tlan bo vanga suspend te an ni.

Suspend chhan tam ber zu ruih vanga suspend-te hi a tlangpuiin duty laia zu in an ni a, office hun chhunga zu rui te, roll call laia zu ruite an awm bawk a; magazine guard duty laia zu rui suspend 12 zet an awm bawk.