ZALEN November 17, 2025: Aizawl District Crime Review Meeting chu vawiin khan SP, Aizawl office-ah neih a ni. He hun hi Zosangliana IPS, SP, Aizawl in a kaihruai a, Addl. SP (Crime), Aizawl District, Sub-Divisional Police Officer (SDPO) te leh Police Station a Officer-in-Charge(OC)-te an tel a ni. 

He hunah hian Aizawl District a dan leh thupek kenkawh chugchangte sawiho a ni a. Aizawl DEF hnuaia Police Station hrang hranga thubuai ziahluhte enho niin hnuchhui leh venhimna kawnga hmalak dan turte sawiho a ni bawk.

SP, Aizawl chuan ILP checking nasa lehzual a hmalak a pawimawh thu a sawi a. Sairang thleng rel a rawn luh tak avangin Mizoram pawn atanga khualzin leh hnathawk a inhlawh tura rawn lut an pun thu te, an la pun belh zel tura a ngaih thu leh heng thil te avanga ILP checking leh a enforce hna chu khauh zawk a kenkawh a pawimawh thu a sawi bawk. Sairang Railway Station a Police duty indah mek bakah an tha tichak turin dahbelh tum a nih thu a tarlang bawk a ni.  

Crime Review Meeting-ah hian Police Station hrang hrang a thubuai ziahluh leh investigation chungchangte uluk taka sawiho a ni a. Kumin November ni 15 thleng khan Aizawl DEF hnuaia Police Station hrang hrangah thubuai 1593 ziahluh niin heng zinga thubuai 897 (56%) chu chinfel tawh a ni. 

Thubuai 431-ah hnuchhui hna kalpui mek niin chhuichhuah loh thubuai 264 a awm bawk. Thubuai ziahluh atanga 66% hi rukruk leh inrawk thubuai a ni. Kumin a thubuai ziahluh Court-in a chinfel tawh atanga 90%-ah dan bawhchhetute thiamloh chantir an ni bawk. Bawngkawn Police Station-ah thubuai ziahluh a tam ber a, kumin ah thubuai 578 ziahluh a ni tawh a ni. 

Kum kal mekah Aizawl District chhungah thubuai liantham zingah tualthah (murder) thubuai pakua ziahluh a ni a, heng thubuaite hi chhuichhuah vek an ni. Naupang kum tlinglo pawngsual leh hurherhna lamhawi a pawikhawih thubuai sawmruk (60) POCSO Act hnuaiah ziahluh a ni. Tin, ruihhlo zuartu leh ruihhlo engemawzat man a thubuai siam a ni a. Kum kal mekah ND&PS Act hnuaiah thubuai sawmthum (30) awm tawhin dan bawhchhia mi 28 man an ni tawh bawk. 

Ruihhlo chi hrang hrang Heroin, Methamphetamine, Ganja leh Crystal Meth engemawzat man niin heng ruihhlo mante hi Vaibelchhe 39.21 a ni. Police Station hrang hrangten’ ILP checking an kalpui thin a, ILP nei lova Mizoram a lo lut leh ILP dik lova khawsa non-Mizo mi 793 man an ni tawh bawk a ni.