ZALEN Oct. 21, 2024; Kum 1966 atanga vawiin thlengin Mizoram police zingah, duty laia nunna chan mi 54 lai an awm tawh.

October 21 hi India ram pumah "Police Commemoration Day" atan hman thin a ni a, Mizoram-ah pawh tukin dar 7-ah khan District Headquarters leh Battalion Headquarters-ah te Commemoration parade hi neih a ni a. A hmanna pui ber Aizawl-ah chuan "Martar Thlan" 1st Bn. MAP Headquarters, Armed Veng-ah Anil Shukla, IPS, DGP, Mizoram, senior police officer, CRPF, BSF, SIB leh Assam Rifles officer ten hun hmangin urhsun taka sunna neiin, martar thlanah zahna pangpar dah a ni.

India ramah, September 1, 2023 leh August 31, 2024 inkar khan police mi 216 zetin an mawhphurhna an hlenna kawngah nunna an hlan a, tin, August 15, 1947 atanga August 31, 2024 thleng khan police 36,449 zet martar an awm tawh bawk.

Kumin chhung hian vanneihthlak takin Mizoram police zingah duty laia hmelma kut a thi an awm lo a, kum 1966 atanga vawiin thlengin Mizoram Police zingah, duty laia nunna chan mi 54 lai an awm tawh thung a ni.