ZALEN July 18, 2026: Vawiin khan Thenzawla Police Training School (PTS)-ah 70th Batch of Police Constable Passing Out Parade chu Chief Minister Lalduhoma chuan Khuallian niin a hmanpui a. Home Minister K Sapdanga chu Khualzahawm a ni.

Chief Minister chuan vawiina Constable Pass Out zawng zawngte leh an chhungte chu a lawmpui thu a sawi a. Sawrkar hnate chu Equality for All Principle chang chawiin dik tak zelin lak a ni a. Thalaite pawhin sawrkarah rinna an nei thar zel a ni. Vawiina Police thar 275 te pawh hi, duhsak bikna emaw, sawipuitu Minister leh Politician tel lo va, intihsiakna fair tak kaltlanga tlingte an ni a. Chhuanawm a tih thu a sawi.

Chief Minister chuan Mizoram-in Zu vanga service laia thi police-in a ngah thin a. Police-te hi taksa hrisel tak nei tura beisei an ni a, service-a lut tur pawhin physical fitness exam a tel a. Training tinreng-ah fitness a tel zel a. A taka hna an thawh hunah pawh physical fitness hi chhawm zel tur a ni. Police tihhmasawn hna hi an la kalpui zui zel dawn a, sualna lo chhuak thar zelte hmachhawn thei tur leh misualte hmakhalha kal zat zat thei tura thuam chak an duh tih a sawi.

Mizoram DGP Sharad Agarwal-a pawhin Trainees-ten tluang taka an training an zo thei chu a lawmpui thu a sawi a. An rilru leh an taksa tuai hriam reng tura inthunun turin a chah bawk.

Vawiina Police Constable Pass out te hi mipa 249 leh hmeichhia 26, an vaiin mi 275 an ni a. Trainees te hi Armed branch atangin mi 198, Unarmed branch atangin mi 51, Mechanical branch atangin mi 8 leh Compassionate grounds-in mi 18 te an ni. Training neih chhunga ti tha bik thlanchhuahte hnenah Khuallian hian lawmman a hlan a. 

Lawmman dawngtute chu:

1. Governor running trophy and gold medal All Round Best - F Lalngaihzuala

2. Chief Minister running trophy and gold medal Proficiency in drill - H Lalremruata

3. Home Minister running trophy and gold medal Proficiency in legal studies - Women Vanlalawmpuii

4. DGP Mizoram running trophy and gold medal Proficiency in general studies - Tluangzathanga Zahau

5. Additional DGP running trophy and gold medal Proficiency in weapon - K Lalhmangaihzuala

6. IGP (Hqrs) running trophy and gold medal Proficiency in physical training - Zirnunsanga

7. Principal Police Training School running trophy and gold medal exemplary conduct – F Lalngaihzuala

8. DIG (Training) running trophy and gold medal proficiency in shooting - Richard J Lalthanmawia