Aizawl: Ministry of Women & Child Development-in state leh Union Territory-a police force zinga hmeichhe zat chu zaa 33-ah tih tam ni se ti a hma a lakna chu Mizoram-ah pawh zawm ve tum a nih thu AIGP II Lalbiakthanga Khiangte chuan a sawi. Zalen palai zawhna chhangin Lalbiakthanga Khiangte chuan Women & Child Development Ministry hmalakna chu zawm ve tum a nih thu sawiin, “Tunah hian zaa 10 ang vel chauh hmeichhia an awm a, police lak leh hunah chuan post ruak zaa 33 chu hmeichhe tana dah tum a ni,” a ti. Ministry of Women and Child Development hian State leh UT tin te bia in gender nghawng case hrang hranga police ten hna an thawh that lehzual nan police force a hmeichhe awm zat tihpun chu a tul niin a sawi. Cabinet thutlukna hmangin U.T. zawng zawngah chuan zawm tura tih niin Ministry of Home Affairs pawhin state tinah advisory a chhuah a ni. Tun thleng hian state/UT 8 in an zawm tawh a, state dang tam zawk te pawhin hna an thawk tan mek niin Ministry of Women & Child Development Achievement 2014-16 chuan a tarlang a ni.