April 14, 2023; Kumin January - March chhungin Mizoamah ruihhlo (heroin) kg 16.75 police ten an man tawh a, chu chu Rs. Vbc. 6.03 man hu a ni. Ruihhlo an man sak zingah Myanmar lam mi 13 an tel a, naupang kumtling lo 2 an tel bawk.

Mizoram police thuchhuah tarlan danin, kumin thla thum chhunga heroin an man zawng zawng kg 16.75 hi international market rate ah chuan Rs. Vbc. 83.75 hu zet a tling.

Ganja kg 10.21 man tawh bawkin, chu chu Rs. 51,070 hu niin, Opium kg 2, Rs. Nuai 3 hu bakah, Codeine kg 1.10, Rs. 1,350 hu bakah Pseudoephedrine kg 210.72, Rs. Nuai 89.56 hu man a ni tawh bawk.

District hrang hrang zingah Champhai chu kumin thla thum chhunga heroin man tamna ber niin, kg 6.31 man a ni a, thubuai 20 ziahluh a ni.

Ruihlo kaihhnawih a police in an man zawng zawng chu mi 90 niin, 70 chu mipa an ni a, midang 20 te chu hmeichhia an ni. An mi man zingah kumtling lo 2 awmin, mipa ve ve an ni a, Myanmar lam mi mipa 7 leh hmeichhia 6, Assamese 3, Manipuri 1, Tripura 1, Meghalaya 1 niin, midang zawng chu Mizoram khua leh tui an ni.