ZALEN June 21, 2024; Nimin tlai khan Kawnpui Police te chuan tunhnaia mimal In rawk avanga thubuai nei mek Lalhmingmawia (22), Kawnpui chu an man a, vawiin hian Court-ah hruai a ni ang.

Kolasib Today in a tarlan danin, Lalhmingmawia hian tunhnai khan Kawnpui khaw chhungah mimal In 2 leh Dawr 1 a rawk niin a sawi a; mimal in pakhat a rawk phei chu tum hnih lai a lut niin a sawi. Heng In a rawkna atang hian pawisa fai engemaw zat a ru chhuak a, man a nih hnu hian pawisa a ruk te hi hmuh let tur a awm lo a ni.

Tun thla June ni 2, 2024 (Pathianni) khan Kawnpui Venglai-a mimal in pakhat atangin Lalhmingmawia hian pawisa fai Cheng Nuai 2 chuang a ru a; hei bakah hian Hmarveng-a in pakhatah pawisa fai leh thil dang a ru a, Vengthar-a Dawr pakhar atangin pawisa a ru bawk.

Lalhmingmawia hi nikum February ni 22, 2023 khan ruk ruk thubuaiah Bawngkawn Police te chuan anlo man tawh a; hemi tum hian Police Station hrang hrangah ruk ruk thubuai 15 zet a nei a, Kawnpui PS-ah pawh Bank leh mimal in rawk avangin thubuai 4 lai neiin, Jail-ah tan tir alo ni tawh.