ZALEN Feb 23, 2026: Tun dinhmunah Mizoram police hnuaiah post ruak battalion li (4) daih a awm mek.

He thu hi vawiin Assembly budget session zawhna leh chhanna hunah memberte zawh belhna te chhanga sawiin Home minister K Sapdanga chuan, police post ruak te hnawh khat turin state fund in min permit chiah bawk si lo tih a sawi a, heti chung hian a awm ang ang ten theihtawp chhuahin dan kenkawh kawngah tan an la mek zel tih a sawi.

Home minister chuan police station hrang hrangah motor an inpe mek zel tih sawi bawkin, police station leh police outpost te kan lo neih thahnem avangin a indaih motor ruahman a la har rih tih a sawi bawk.

Ram pum a police quarter te, police station te leh outpost te beat post te thlengin a building hi police departmentah an tlakbalna lai ber a ni tih an hriah thu te, PHQ atangin ram pum survey neih a ni a, mamawh zualna hriat chian a ni tawh a, engtinnge kan thuam ang tih ngaihtuah mek a nih thu a sawi. "Tunhnaiah central atangin fund kan dawng a, chungte chu khawpui mai ni lo hmun kilkhawr zawkah te pawh tangkai taka hman tangkai dan tur chhep chhoh mek zel a ni," home minister chuan a ti.