Aizawl : Nikum 2023 leh kumin 2024 chhungin Kawnpui Police Station chuan rel kawng siamna hmanrua thir chi hrang hrang ruk bo a nih thu leh an hmanrua ruk a nih chungchangah FIR 11 an dawng a. FIR an dawn atang hian thubuai pahnih ziah luh niin thir ruk bo hmuh let sak Kg 400 chuang an nei tawh.

Kawnpui PS chhinchhiah danin nikum chhung khan rel kawng siam hna thawktu contractor hrang hrangte atangin thir leh thil dang bo avangin FIR pariat an dawng a, kuminah pathum dawng tawhin thubuai pahnih ziah luh a ni tawh.

Kumin chhunga FIR an dawnah rel kawng siamna bungrua bo zawng zawng hi a vaiin Rs. nuai 17 hu a ni a, nikum chhunga thil bo an report hlutna hi Rs. nuai 9 hu vel niin a hlutna an ziah lan loh eng emaw zat report a ni bawk.

Kawnpui PS chuan heng rel kawng siamna thil bo report an bawhzuina atang hian kg 400 vel an hmuh letsak tawh a, police-te bungraw hmuh let tam zawk chu thirchhia leikhawmtute hnen atang niin sawi.

Thudawnna dang chuan rel kawng atana hman thir bote hi leiverh (tunnel) chhung, a thim deuh laia awm leh lei (bridge)-a mite an ni deuh ber a, thil bo tam zawk chu mihring tha maia ruk bo vek theih a ni lo niin an sawi bawk.

Rel kawng siam meka hmanraw ruk bo a nih thin chungchangah hian Kawnpui PS-ah Kawnpui Joint VC leh police te chuan thirchhia lei thinte chu a kokhawm tawh a, police-te chuan rel kawng siamna hmanrua bote hi report an dawn angin chak taka bawhzui zel a ni dawn tih leh rutu leh lo lei chhawngtute chu dan angin an um zui zel tur thu an hriattir tawh a ni.