Aizawl: Kum 2007 atanga kumin 2016 chhung khan Mizoram Police chuan silai chi hrang hrang 427 an man tawh a, hemi kaihhnawih ah hian thubuai 282 ziaklutin silaimu 19674 an man tawh bawk. YMA rorel inkhawm tumkhatna, R.Dengthuama Hall-a neih zawh taka Kumpuan thupui a sawi naah Central YMA General Secretary Tv Lalhmachhuana chuan silai, a mu leh hmanruate hi ramri kaltlangin tawlhruk thin a nih thu a sawi. Kum 2001-2016 inkar chhungin khawchhak lamah Pseudoephedrine nasa taka tawlh chhoh a ni tiin Excise Deptt.-in an man ringawt pawh mum 61845541 a tling nia sawiin man chhuah loh a tam zawk fe leh nghal niin a sawi. Tv Lalhmachhuana chuan ramri kaltlanga ramsa leh ramhmul tawlh ruk pawha tam hle nia sawiin Chawke, Saphukawr, Anchiri, nauban etc. te a riral chak hle a ni, a ti bawk. Golden Tringle-a Drugs tawlhtuten Drugs Route him bera an ngaih chu, Mandalay - Kalay - Tidim - Aizawl - Silchar kawng a ni tiin kum 2011 - 2015 chhunga Drugs tawlh ruk ching Foreigner Mizoram Excise & Narcotics Deppt-in an man zat chu 295 lai an tling a ti bawk. Heng bakah hian pawisa lem pawh a lo lut nual a, kum 5 (2011-2016 Upto June) chhung khan Rs. 49,56,400/- ngawt Mizoram Police ten an man tawh tih a sawi bawk.