ZALEN October 22, 2023 : Nimin khan India ram pumah an duty laia Police nun chan te hriattrengna ni ‘Police Commemoration Day’ hman a ni a, Aizawl-ah chuan ‘Martar Thlan’ 1st Bn. MAP Headquarters, Armed Veng-ah DGP Anil Shukla hova hman niin Police Officers, CRPF, BSF, SIB leh Assam Rifles aiawhte an tel.

Kumin chhung hian Mizoram Police zingah duty laia hmelma kuta thi an awm lo. Kum 1966 atanga nimin thlengin Mizoram Police zingah duty laia thi mi 54 an awm tawh a. Nimin Police Commemoration Day-ah hian India ram hmun hrang hranga police, September 1, 2022 atanga August 31, 2023 chhunga duty laia thi mi 188-te hming chhiar chhuakin sunna neiin martar thlanah zahna pangpar dah a ni.

India-a Aksai Chin pela ralthuam nena lut ru China sipai rualte chuan mahni ram venghim tura duty mek India police-te chu Hot Springs (Ladakh)-ah October 21, 1959-ah an lambun a, police 10-in nunna an chân phah a ni.

He ni hi police, ram tana nun pete hriatrengna ‘Commemoration Day’ atan India sorkar chuan puangin ram pum puiah kum tin hman turin a rel a ni.