Aizawl: Nimin zing dar 8 khan 1st Batallion MAP hmunpui, Armed vengah duty laia Police thi te zahna leh sunna hun ‘Police Commemoration Day’ hman a ni. Commemoration Day-ah hian ni 1.9.2016 atanga ni 31.8.2017 inkara Police leh Para Military force boralte hming chhiarchhuah niin anmahni zahna leh sunna neih a ni a, DGP Thianghlima Pachuau IPS-in a hmanpui a ni. Ni 1.9.2016 atanga ni 31.8.2017 inkar chhung hian India ram hmun hrang hrangah police leh para military force thi 370 an awm a, Mizoram police boral an awm lo. Hun hman zawh hian DGP leh officer te hian Mizoram Police, an duty laia hmelma kut tuara thi te hriatrengna ‘Martar thlan’-ah pangpar an dah nghal. Police Commemoration day hi ni 21.10.1959-a China-in Ladakh Police post rawn la a, mi 9 an kahhlum hriatrengna atan kum tin hman thin a ni.