Aizawl May 28, 2024 : Vawiin khan Lok Sabha Inthlanpui 2024 duty tura tirh chhuah Mizoram Armed Police mi 1047 ten tun thlenga vote an thlak theih loh chungchangah Chief Election Commissioner, Election Commission of India hnenah Rajya sabha MP K. Vanlavena chuan lehkha a thehlut.

Lehkhaah hian Lok Sabha MP Election 2024 duty tura Mizoram atanga tirh chhuah Mizoram Armed Police mi 1047 te, tun thlenga vote thlaktir loha an la awm chu an dikna chanvo hupbeh sakna a nih thu leh a dik loh thu te, vote thlak chu India khua leh tui an nih anga an dikna chanvo a nih thu leh, vote an thlak ngei theihna tura ngaihtuah nawn leh turin ECI hi a ngen a ni.