Aizawl : Opposition party ten economic policy kan tlang zarh ta hlawm a, party dang policy hi chu kohhran leh mi thiamten tha lo an tih, ‘sem policy’ tia sawi thin ang chi kha niin a lang a. Kan policy chiah hi ram din chhuahna turah ka ngai a. Mipuiin thu dik an hriat theih nana policy debate neih puiah party dang te hi ka cho a ni, PC Party President Vanlalruata chuan a ti.

PC Party Executive Committee Meeting chu vawiin, October 13 khan neih a ni. He hun kaihruaitu President Pu Vanlalruata chuan sawrkar-in a tih tur pawimawh ber chu ram economy chawikan a nih thu a sawi. “Tuna sawrkar lai MNF hian an economic policy chu SEDP vuaha an kalpui rualin hei hian kan economy a chawikang dawn lo tih a chiang tawh a ni,” a ti. 

Vanlalruata chuan PC Party economic policy, ‘Khawl Hnuh Hmasawnna : Mi tin tan In leh Hna’ chu ram hmasawn te hlawhtlinna kalphung zuia siam a nih thu sawiin, “Indopui pahnihna zawh hnua ram hmasawn chak thar te hi he kan policy anga an kal avanga hmasawn chak an ni a, India ram hmasawnna pawh hi hetiang kalphung an hman atanga chak ta hi a ni,” tiin Mizoram din chhuah nan PC Party policy tihhlawhtlin ngei a ngaih thu leh chumi atana nasa taka tan la turin party hruaitu kalkhawm te a fuih.

Ruata chuan opposition party dang economic policy tlangzarh chu sem policy, ramin a din chhuahpui theih loh tur, mi tlemtein an hlawkpui leh tur chi nia a ngaih thu a sawi a. Mipuiin party-te thil tum an hriat chian theih nan policy debate neih a tul thu a sawi a. Sem policy that lohzia kan hriat chian tawh laia mi thenkhatin an aupui zel chhan chu a dawngtu aia a semtuin an hlawkpui thin vang nia a ngaih thu a sawi. “Mau chi sem pawh a chingtuten la hlawkpui lo mah se, millionaire pui an awm a, vaimim chi sem pawh hi tute emaw chuan an hlawkpui ngawt ang,” Ruata chuan a ti bawk.

PC Party economic policy hi kan ramin a din chhuahpui tur ngei a nih avangin kan ram tun din nana thawh hopui atan PC Party chuan mi zawng zawng kan sawm a ni.