- Zosangliana (Zotea) Democracy ramah chuan ram rorelna fawng vuantu nihna chan tumin Political Party-ten mipui vote an inchuh thin a. Political Party-te chuan sawrkarin a tih tur tarlanna Manifesto siamin vantlang hmaah an tlangzarh thin a. Tunhma deuha Mizorama kan Party-ten Manifesto an siam thinte kha kan thlirlet chuan, sawrkarna changtu Party-ten an Manifesto kha an enzui lo va, tihhlawhtlin mumal an nei ngai meuh lo a ni. Amah kan Chief Minister Pu Lalthanhawla’n “Manifesto te chu kan inziah that siak mai mai alawm,” a tih kha thudik tak niin a lang a ni. Mipui kan fing deuh deuh zel a, Manifesto mai chuan sawrkar tha din ngei an tum leh tum loh a tichiang tham lo nia kan hriat tak vang nge, tun hnaiah Mizorama Political Party lian pahnihte chuan sawrkar an chana an tih tur duanlawkna (Policy & Programme) mipui hriat turin an rawn tlangzarh ta a. Mizoram Pradesh Congress Committee (MPCC) chuan New Economic Development Policy (NEDP) tih an vuah a. Mizo National Front (MNF) chuan Socio Economic Development Policy an ti ve thung a. A tua te pawh hian sawrkarna lo chang ta se, an sawrkar chuan dapchawp ngai lovin an tih tur an duang lawk vek tawh tihna a ni. A tlachawpa kal tum Party-te ai chuan rin an kai nge nge awm e. Khawvel democracy ram hmasawn leh khawvel mipuiten entawn bera kan thlir, hnam fing leh ropui tia kan ngaih, United State of America leh Britain ramah chuan tunhma kum tam tak kal ta atang khan Two Party System-in vawiin thleng hian an la kal a. Party thar siam belh tulin an hre lo niin a lang a ni. Kum 100 chuang party pahnihten sawrkar an la insiam chhawk zel chu a nih khu. USA-ah chuan Democrat Party leh Republican Party an ni a. Britain-ah chuan Labour Party leh Conservative Party te an ni. Tunah hian Mizoramah hian Political Party tia chhiar tham deuh chu 5 (panga) kan nei a. Mizoram Pradesh Congress Committee (MPCC), Mizo National Front (MNF), Zoram Nationalist Party (ZNP), Mizoram Peoples Conference (MPC), Baratia Janata Party (BJP, Mizoram Unit) te an ni. Hetihlai hian Mizorama Political Party awm tawh sate chu hmantlak loh, ram hruai tur atana rintlak loh nia ngai pawlte chuan 2018 Mizoram Assembly Election-ah hian Party thar dina chuh ve tur nge tiin Study Group Pu Laltlanthanga kaihhruai an awm mek tih thawmte a lo ri a. Hetiang deuh Mizoram hmangai tak tak nia inngai hi tunhma pawhin an lo ding tawh thin a, reilote ah an hlamzuih leh mai thin a. Citizen Common Front (CCF) kha India ram Member of Parliament (MP) thlan dawnah an rawn inhawtbuk tha hle a, Kohhran thenkhat puihna pawh an dawng tha viau a ni awm e. Member of Parliament Candidate atan Prof. Dr. H. Lallungmuana, Synod Revival Speaker an vawrh chhuak a, rinphak bakin chakna a rawn chang ta mai a. Mahse, rei pawh MP nihna a chan hmain Delhi lama vote pawimawh tak thlak tura an kal laiin Airport-ah suamhmang a tawk kan ti dawn nge, thlemna hneh harsa tak a tawh thawm hriat a ni ta hlauh a. CCF pawh a chuai zui ve leh ta mai a nih kha. CCF angin MLA pawh an chuh zuia mah se an dahkham an chawi fai deuh vek a ni. Mizoramah hian party ding zuih ral ta mai hi a tam tawh viau a ni. Mizo Union, Mizoram Democratic Party (MDF) (Pi Sanglianchhungi din), Mizo Peoples Party (Pu Hmarliana din), Labour Party, Mizo Peace Forum (MPF), Mizo National Union (MNU) (Pu Lalduhawma din), Janata, Janata Dal (Pu Lalduhawma), Citizen Common Front (CCF), Lokshakti, MNF (N) (Pu Lalduhawma), Congress (I), Congress (S), Mipui Pawl (Pu M. Lalmanzuala). Heng Party-te hi tunah chuan a dintute pawhin an sawi zui ngai tawh loh, zuih ral tate an ni. Political Party hi phur thut avanga din ngawt hi a fuh lo fo tih chu Mizoram leh ram dang, keini aia hnam fing zawk leh entawn bera kan neih USA, Britain-ah te pawh a awm fo a. USA leh Britain-ah pawh election dawna party awm sa duhkhawp lohna chu a awm ve tho a ni. Mahse, tuktinpar ang deuhin ni a lo tlangsang a, a vuai leh mai thin ang hian rei an daih ngai lo tih chu khawvel politics history-ah hian a chiang viau a ni. Ram hruaitute sitna, a hruai mek leh lo hruai tawhte duhkhawp lohna hi chu a awm reng ang. Mihring hi ni tin, darkar tin hmasawn zel kan ni a. Khawi ramah mah mipuite duh ang zana rorelna kalpui thei sawrkar hi an awm lo ti ila kan ti sual awm lo ve. Amaherawhchu, tihtakzeta tha thawha ram kaihruai thin, ram pawhin hmuh theiha hma a sawnpui sawi tur tam tak an awm tih erawh sawi hmaih chi a ni lo vang. Tuna India ram state lian leh state tenau deuh hruaitu Bihar Chief Minister, Nitish Kumar leh Tripura Chief Minister, Manik Sarkar te hi chuan an hruaina atang hian mipui leh an state hian hma chu a sawn ngei a ni tih kan hria a ni. Central sawrkar kal tawh Congress rorel lai khan Mizoram Central India atanga teha ram kilkhawrah hian, kum 50 dawn kan hrawn a, inthlan dawn hnaiha Central Minister te rawn campaign thawm kan hriat bak kan hre ngai lo tluk a nih laiin, BJP sawrkarah chuan Minister hrang hrang an rawn lawr chhen a, Central aawrkar department official te phei chu thla tin an lo kal emaw tih tur an ni ta a, Central sawrkar theuh theuh an inthlau hle a ni. Mizorama kan politician thenkhat thil tha duh viau anga kan lo ngaih thin, Opposition MLA an nih laia thawm na tak thin, Mizoram siam that duh ngawih ngawiha kan lo ral thlir thin te, ruling lamah an han awm a, SU an ti leh se e, an tih ang deuh an ni leh thin hi chuan mipui min tibeidawng ang tih a hlauhawm khawp mai. Mahse, beidawng thei kan ni si lo, beidawnna hi hlawhchhamna a ni tih nghet taka vuantu tan chuan a hrehawm teh thin zawng a nih hi. Keia ngaihdan chuan Party thar hmanga Khuangchawi tum hi chu a harsat hle ka ring a, beiseina sang tak neihpui chu a harsa a ni.