ZALEN July 31, 2026 : Congress party chuan vawiin khan Congress Bhavan Golden Hall ah 'Political Session' an nei a. He huna thusawitu MPCC treasurer Dr. Lalmalsawma Nghaka chuan, kum 2028 inthlan lo awm turah hian Congress party chu a fawng chelhtu ni turin an thawk chhuak tan a. Party office-ah Congress an lun ber tawh a, social media-ah pawh an lawr ta hle niin a sawi.

Dr. Lalmalsawma Nghaka chuan Congress hian Land Use Policy hming ngai a zuar leh thin a, NLUP an sawi ngamna chhan chu an intiamnaah an din ngheh thin vang a ni a. Party dang hi an intiamnaah an ding thei lova, an hlawhchham zia a hriat, an policy zuar nawn leh ngam an awm lo. Politics-ah chuan a pawimawh ber chu Party-ten intiamna an tih hlawhtlin leh hlawhtlin loh hi a ni, a ti.

MNF chuan MIP leh SEDP an neih an zuar ngam tawh lo niin a sawi a, Party dang leh chuan mumang rama awm an sawi a, zirchianna an nei an tih pawh an zirchiang tawk lo, an policy pawh thlasik mumanga anga thamral leh thin niin a sawi bawk

Congress Treasurer chuan sawrkar laiin Bana Kaih policy an neih chu mipuite banah an kai dawn emaw tih laiin mipuite ban phakah an bân an dah duh leh si lo a, mipuiten an ban phak lo a ti a, ZPM chu an sawi sel ngawr ngawr ni lovin a, thudik an sawi mai zawk nia sawiin, "Restricted tender sawisel nasa ber kha tunah chuan a uar ber an ni a, Restricted tender chu a hna thiam bik ten, an tulna hmuna hma an lakna tur a ni a, vawiin ah chuan quarters sak thlengin an ti fai vek a, lui kawr siam mai mai pawh an restricted vek a ni," a ti.

Health Care chu mipui sum tlingkhawm a ni a, dik felfai thlap ni ta se, mipuite hnenah an pho chhuak ang. Thup an neih chuan thil fel lo a awm tihna a ni a, a vanduaithlak hle, a ti bawk. 

Chhiah chungchang sawiin Dr. Lalmalsawma chuan, "Tax (VAT/GST etc) hi chu dan awmsa-a chhiah kan pek tur bituk awmsa a ni, Cess hi chu sawrkar in a mamawh phuhruk nana chhiah a siam belhchhah a ni. Cess kan pek zozaite hi engtin nge an hman tih mipuiten kan hriat a ngai hle. Heng mipuite sum tlingkhawmte hi langtlang sawrkar min tiamtute hian inthlan dawna campaign nan an hmang tur a ni lo," a ti.

Sawrkar department lian berte zinga mi Education Department ten ZPM party chhung inrelbawlna ngaihtuahtu tur PAC Committee thutlukna an nghak niin MPCC Treasurer chuan a sawi a. hei hi te hi a lungchhiat thlak hle tiin, Council of Ministers ngaihtuah tur ni awm tak a ni, a ti.