ZALEN July 27, 2026 : Congress party chuan vawiinah khan Congress Bhavana Golden Hall ah 'Political Session' an nei a, he hunah hian Rosiamngheta, General Secretary, MPCC chuan thu a sawi. 

Rosiamngheta chuan, “Hnam anga kan din chhuahna tur hian tunlai politics inher rem mekah hian theih tawp kan chhuah a ngai. Mizo hi kan hnam leh kan sakhua Kristianna nena kan din chhuah a tul. Politics hi tangka leh rangkachak zawnnaah i ngai lo ang u, hnam leh ram damchhuah nan a ni tih i hre fiah ang u. Thinlung taka kan hnam leh sakhua dam chhuah nan i khel ang u,” a ti.

“BJP sawrkar hian Kristiante hi min nuai mek a ni. Chanchinthain mawhphurna min pe, khawiah mah Kristian te hian Hindu leh Mosolman te bungrua hi kan suasam ve ngai lo. Chuti chung chuan thang min la kam hnan duh a nih chu. Chu vangin, hma i la ang u. Chanchintha hril hi dan bawhchhiatna a ni lo. He ram tan hian Mizo Kristian Nationalist kan ni tur a ni. Politics hi pawisa zawn nana hmang tawh loin, kan ram, kan hnam, sakhua humhim nan kan hmang tur a ni,” a ti bawk.

A sawi zelnaah, “Party zawng zawngah harsatna nei lo kan awm lo. Unau chhul khat kual thawnthu sawi mah a hrang a, chhul hrang thiau han kal khawm hi kan thuhmun vek lo. Kan vantlang ram leh hnam, sakhua him leh hmasawnna kan duh avangin kan thawkho mai a ni. Party ang zawng chuan ZPM an buai ber a, MNF in an dawt a, Congress kan lungrual ber tih hi Zoram mipuiten min hriatpui rawh u. Congress chu kan philosophy avangin kan kal khawm a, party dang chu dinhmun avangin an buai mek zawk a ni,” a ti.

“Mizo Nationalism hi Congress hian kan ken tlat zel a ngai, kan party pui ZPM leh MNF ten BJP ah tlatlum zawk nih inchuhin Mizo Nationalism atangin min kalsan leh ta bawk si a, theih tawp kan chhuah a ngai. FCRA Bill 2026 hi kan MP pahnih hian na takin an dodal a, a remti lo zawnga an vote ngei hi Zoram mipuiten kan beisei tlat a ni,” tiin Rosiamngheta chuan a sawi.