Aizawl October 13, 2023: Vawiin khan ZPM General Headquarters buatsaihin party office-ah Political Session hun hman a ni a, 'Nghehna leh rinawmna’ tih thupui hmangin Resource person Professor Lalbiakdiki Hnamte, PAC member in hun a hmang a, politics chu hlawkna neih tuma khelh chi a ni lo a ti a, politics hmelhriat dan thlak tul a tih thu a sawi.

Professor Lalbiakdiki Hnamte chuan, "Mizo ten politics kan hmelhriat dan hi a fuh lo deuh a, chuvang chuan politic hi a khelhin kan khel a ni. Politics hi mi tinreng nghawng a nih avangin thenkhatin 'Politics ka ngaih ven lo' an ti thin chu thil ngaihtuah chian loh vang a ni. Politics a kan ngaihtuah ber tur chu ram leh hnam hmasawnna hi a ni a, chuvangin nghet tak leh rinawm taka ram rawngbawl hi kan tih tur a ni. Mimal hmasawnna chauh hian ram hmasawnna a thlen loh avangin, vawiinah pawh hian kan ramin a tuar mek a, mi tam takin vote an thlak peih loh chhan leh politics ka ngaihven lo an tih chhan ber chu, hlawkna an nei ve dawn chuang lo va an hriat vang a ni," a ti.

Dr. Dikteii chuan, "Heng kan politics hmelhriat dan dik loh avang hian mi tlemte hausakna leh hlawkna tura inhnamhnawih hi thil tulah an ngai lo. Chutiang chu kan ram mipui tam takin politics kan hmel hriat dan a nih avangin kan politics hmelhriat dan hi kan thlak a ngai hle a ni. Politics chu mipui rawngbawlna a ni a, mi tinin hma an sawn theihna tur leh ram rawngbawlna felfai nei tura inrelbawlna a ni,” a ti.

Policy chungchang sawiin Dikteii chuan, “Party mi leh sa te phei chu kan policy-ah rinawm taka kan awm a ngai a, in chibai loh vang leh thlalakpui loh vang mai mai tea kan policy kan kalsan thei a nih chuan mi rilru nghet leh tum mumal nei lo ang chauh kan ni a, politics a kan thil tumah kan chiang chiah lo tihna a ni. Party-ah kan awm a nih chuan chhungkua kan ni tih kan hriat a ngai a, party dang thangkama kan chhungkaw member an lo awk palh a nih pawhin nuih san mai lo va, a tuam damtu leh a fuihtu kan nih a tul a, kan infuih a tul a ni. Mi dangin min chirh thehna leh dawt thuthang buaipui hman kan ni lo va, hma lam pana kan kal zel a tul a ni,” a ti bawk.

Party boruak chungchang sawiin Dikteii chuan, “ZPM chu ram hmangaihtute intelkhawm kan ni a, thuthlung pakhat vuana nghet taka insuih khawm kan ni. Chutih mek laiin mahni mimal hamthatna beiseia kan sawrkar ve hauh hma a, policy a rinawm lova min peih loh san ta thenkhat an awm a, chungte chuan an hlutna leh zahawmna tam tak an hloh a ni tih an in hre lo. Mimal hlawkna leh hamthatna en lova, ram mipui ten hma kan sawn a, raltiang ram kan kai ve theihna tura kan policy-a rinawm taka kan awm tlat hi a pawi mawh a ni. Kan party a lo lut ve turte pawhin kan policy te zir hmasa a, duhthlanna siam tur leh duh thlanna an siam tawh a nih chuan nghet taka policy a ding turin kan sawm ni,” a ti bawk.