October 17, 2023; MLA inthlanpui vote thlak ni a hnai zel a, 'politics tansfer window' pawh tu hawn ni hran lo mah se, zau takin a inhawng mek tih a hriat theih a, a hmuh theih bawk.

Tute'n emaw fiamthu titak in heti hian an sawi thin a, 'Mizoram a piangthar tawh zat hi Mizoram mipui let aia tam an ni tawh...' tiin.

Hetiang tho hian, Mizoram political party te hian an party mi leh sa hmingziahna emaw, mumal taka an party mi zat emaw tal pawh chhinchhiah ta se Mizoram mipui aia tam daih tho hi an ni mai angem...? kumin a vote thlak thei zat tur mi 8,56,868 an ni tih erawh hre reng i la !

Social media lamah 'party zawm thar' tarlan a tam tluk zetin, 'party chhuahsan' lam pawh uar taka tarlan a ni mek a. Hei hian 'politics transfer window' zau takin a inhawng mek tih a tichiang a, chu transfer window ah chuan MLA te hming leh MLA hluite hming pawh a lang nawlh nawlh ta mek a nih hi !

He transfer window hi khar hun awm hran lo mah se, vote thlak ni, November ni 7, 2023 atang chuan 'zuai' lam a pan tawh rih ang a, tam tak tan chuan a lunglenthlak letling hial maithei a sin?

Engpawhnise, heng zawng zawngte hi inthlan ti nuamtu a ni ve pakhat a, 'politics ah chuan thian hlun a awm theih loh a, hmelma hlun a awm theih loh' an tih thin kha maw...