Polythene kan tih mai hi kum 1898 ah German Chemist Hans Von Pechmann an tihpalh thil deuha a hmuh chhuah a ni a, kum 1950-ah khawvel pumah a lar chho ta a ni. Polythene hi a zangkhai avangin hman tangkaina a tam hle a; mahse, tun hnaiah mi thiamten a hrisel lohna leh that lohna an hmuh chhuah tak avangin hmun tam takah khap a ni ta a ni. India ram khawpui thenkhatah pawh khap a ni tawh a, Aizawlah pawh khap emaw, hman tlem tum emawa hmalak mek a ni a. Hemi kawnga hmalakna chi khat atan Aizawl Municipal Corporation (AMC) chuan September 20 & 21, 2018 khan Assembly Annexe-ah No Plastic Exhibition an buatsaih a, hei hian mipui ngaihven pawh a hlawhin tlawhtu pawh an tam hle. Tun dinhmuna Aizawl khawpuiin polythene kan paih belhkhawm chu ni tin quintal 5 chuang a ni a. AMC-in kum 2016-17 a zirchianna an neihah chuan thla khat chhungin dawrkaiten polythene khaina awm chi kg. 8500.53 leh khaina awm lo kg. 2824.87 an tiral a. Dawr 2408 atanga chhuta 98.4%-in polythene ip hi anmahni dawrtute an pe a, 1.57% chauh an hralh bawk. Polythene hi a zangkhai a, ken vel a awlsam a, chu mai bakah a man a tlawm avang hian sawrkarte pawh hian an hmang nasa a; mahse, hriselna kawng a khawih chhiat dan leh ram a tihchhiat dan chhut hian hman loh tawp hi a tha ber mai a. Mahse, tun dinhmunah chuan a thlakna a la awm chiah loh avangin khap bur chu a har ang a, chuti chung chuan hmang tlem tura uar zawka kan inzirtir zel a pawimawh hle. Mi thiamte chuan polythene atang hian natna chi hrang hrang mihringte hian kan kai thei niin an sawi a, hei mai ni lovin a hal khu pawh hi a hlauhawm hle niin an sawi bawk. Chu mai ni lovin, polythene hi a tawih ral har em em mai a, tawih ral thei lo chu a ni lo nain tawih ral tur chuan kum nuai tam fe a duh a. Kan ramah kan hmang nasain kan paih darh nasa em em mai a, hei hian leimin leh chhiatna dang dang a thlen bawk a ni. Tun dinhmuna Mizoramin a mamawh ber tak chu tawih thei lo ang chi hmang lova bag tawih thei chi hmang uar  tura inzirtir a ni. AMC lam pawhin bawlhhlawh tawih thei leh tawih thei lote uluk taka thliar hranga a tawih thei lo chi chu suma chantir leh uluk taka an phum bo zel theih chuan harsatna lo thleng tur hi nasa takin kan pumpelh thei dawn a ni. Hun eng emaw chen chu polythene hi kan la hmang chhunzawm ngei dawn a, mahse hman tlem deuh deuh kan zir a, a thlakna tur tha leh man tlawm ngaihtuah chhoh zel a pawimawh ang.