Aizawl:  Nimin khan Thenzawla AH & Vety Farm Complex-ah Finance Minister Lalsawta chuan Pony Riding Entertainment a hawng. Minister Lalsawta chuan hawnna inkhawmah thu sawiin, “Kan thalaite hi an dinchhuaha an feh chhuah theihna hmun tur kan buatsaih sak a ngai a. Thalaite ber an ral anih chuan kan ram hi a tlachhe mai dawn a ni,” a ti a. Lalsawta chuan sawrkar kut ni loa, mi mal kut hmanga ram hausakna hai chhuah a pawimawh tih sawiin, “NEDP pawh hre chiang loin a thlawna thil sem anga sawisel hi an awm fo a, a thata lawm tur, a chhiata lungngai tur mipui kuta dah vek hi ram changkangzia a ni,” tiin a sawi bawk. AH&Vety Minister Ngunlianchunga pawhin thu sawiin, “Vety hnuaiah hi chuan market awmsa vek a ni a. Market awmsaa kum 40 kan intodelh tawh lo a, chuvangin hmathar kan lak a ngai a ni,” tia sawiin, “Dept.-in kan enkawlho hi a tul angin kan privatise zel ang a. Keini department lam hi kan phai ang a, mipui an pung thur thur ang a. Dept. erawh a ral ang a, kan enkawl mipuite an thang zel tur a ni,” a ti bawk. Thenzawla AH Vety Farm Complex-ah hian sakawr chuan theih 10 dah mek a ni a, sakawr hi nikum December thla khan Manipur atanga lakluh an ni a, an lakluh hnu hian note 3 an nei tawh a ni.