Porto chuan an midfielder Fabio Vieira chu Arsenal hnenah euro maktaduai 40-a hralh an remtih thu an sawi. Season liam ta khan Protuguese top flight-a Porto an champion theihna turin Vieira hian a thawhhlawk em em a, an hralh chhuak mai tur pawh hian mak tih a hlawh hle nghe nghe. 

Portuguese club thu chhuah sawi danin Arsenal hian Vieira manah euro maktaduai 35 an pe hmasa phawt ang a, a dang zawng chu add-ons atangin an pe thung ang.

Kum 22 mi Vieira hian nikum khan European Under-21 Championship-ah Portugal tana khelin player of the tournament-ah an thlang chung pawhin senior lamah a la khel phak lo cheu! Nikum season-a Primeira Liga-ah assist 14 neiin assist ngah ber a ni bawk. 

Vieira hi midfielder a ni chungin goal thun thei tak a ni a, league match 27 a khelhah goal ruk a thun a, Porto hian Portugal league sang ber an chawi theihna turin a thawh hlawk hle a ni. 

Portugal Under-21 team tana tum 21 zet khel tawh Vieira hi, tun nipui chhunga Gunners lamin an player lak luh pathumna tur a ni a, ani hma hian USA goalkeeper Matt Turner leh Brazilian rawlthar forward Marquinhos te an lo la tawh a ni.