Brazil a ni emaw, Portuguese tawng hmanna hmunah emaw i kala ‘Pelé’ tih tawngkam an lo hmang a nih chuan ‘thil pangngai lo, khaikhin theih loh, danglam bik’ an sawina a ni tih i hriat a ngai.

Portuguese tawnga siam, Brazil-a dictionary an hman zinga lar ber, Michaelis dictionary chuan online-a edition an tihchhuah tharah ‘pelé’ tih an telh thar.

He thumal telh a nih theih an hian Pelé Foundation chuan football star, December thlaa kum 82 mi nia thi ta chawimawina atan campaign lian tak an huaihawt a, an hlawhtling.

Player zinga World Cup champion vawi thum ni thei awm chhun hi khawvela footballer tha bera ngaitu an tam hle a. A hming thu mal awmzia, ‘thil pangngai aia ropui, tluk tur leh tehkhin phak tur eng dang mah awm lo, thil danglam bik tak’ tih hi a inhmeh hlea ngaih a ni.

Pelé hian kum 20 chhung khelmuala hun a hman chhungin Brazilian club Santos, Brazil national team leh New York Cosmos tan goal 1,281 zet a thun.

A thih atang khan a lo khelh tawhna, Santos bakah sports channel SporTV leh Pelé Foundation chuan a hming a daih loh nan leh chawimawi nan a hming chu dictionary-ah awmze siamsaka telh turin an nawr zui a. Nilaini khan Michaelis dictionary tichhuaktute pawhin an telh tih an puang ta a ni.

Online dictionary-a dah a nih dan chuan, “pe.lé adj. That or someone who is out of the ordinary, who or who by virtue of their quality, value or superiority cannot be equalled to anything or anyone, just like Pelé, nickname of Edson Arantes do Nascimento (1940-2022), who is considered the greatest athlete of all time; exceptional, incomparable, unique” tih a ni.