Aizawl; Power & Electricity Department chuan kum 2022-2023 chhungin power hralhna atang vaibelchhe 473.88 hmuh an beisei a. Mizorama power hmangtu zingah in luma hmangtu ‘domestic consumer’ chu tam berin power hmangtu zinga 62.16%-in an hmang a ni.

Joint Electricity Regulatory Commission for Manipur & Mizoram in Ningani kaltaa kum 2022-2023 a eng hman man chungchanga public hearing, Aijal Club a neih ah he thu hi sawiin Power & Electricity Department thawktute chuan power hman man vbc. 473.88 hmuh an beisei zinga vbc. 435.54 hi tariff atanga hmuh an beisei a ni a, a bak vbc. 38.34 hi state pawn atanga hralhna atanga hmuh beisei a ni.

Power & Electricity department hotute chuan kum 2022-2023 chhungin Mizoram chuan poemillion unit 602.90 a hmuh beisei a ni tih sawiin heng zinga 494.99 mu chu mipuite hnena pek tura ruahman a ni tih sawiin a bak hi hmun danga hralh tur leh distribution loss tura chhut a ni tih an sawi bawk.

Power department-in kum 2022-2023 chhunga power hman man tihsan a rawt zat hi chawhrualin tuna hman mek aiin 21.05% in a pung a. Domestic bikah chuan 10.87%-in a pung thung a ni. Power & Electricity department chhinchhiah danin Mizoramah power hmangtu (consumer) 2,65,092 an awm a, heng zingah hian domestic consumer chu tam berin 2,23,698 awmin hei hi consumer atanga chhutin 62.16% an tling a ni.

Zirtawpni kaltaa power hman man chungchanga public hearing ah hian mi 10 hnen atangin sawiselna a lut a, chungte chu Vanlalruata, Tuikual South; PC Vanlalruata ZPM Secretary General; Vanlalruata, Sr. Vice President, PC; Samuel Lalhriatpuia, Ramthar veng; Dr. Lalmalsawma Nghaka, President MPYCC; Lalthanpuia Chhangte, Electric veng; C.Lalremsiama, E-in-C, PHE; Lalhriatpuia, Secretary, Mizoram Industry Owners; Assn. Prof. Lalnuntluanga, General Secretary, Central YMA leh Prof. Chawngsailova, President, Mizoram Consumers’ Union te an ni.

Pawl leh mimal ten sawiselna leh an hriatthiam loh hrang hrangte hi Power & Electricity department thawktute chuan an hrilh fiah a. Heng an thu leh hla atang hian JERC chuan kumthar 2022-2023 chhunga êng hman man hi a la bithliah leh dawn a ni.