Aizawl: Power & Electricity department chuan sawrkar kumthar, April 2017 atanga hman tan turin eng chhit man chawhruala paisa 30 a tisang turin JERC ah rawtna a thlen a, hei hi Mizoram Consumer Union leh PRISM chuan an duhloh thu an thlen. Power & Electricity department-in eng chhit man (tariff) tisang tura an dilnaah chuan tuna mipui nawlpui en eng an hman man unit khat Rs. 4.45 ni mek chu 2017-2018 ah chuan chawhrualin Rs. 4.75-ah tihsan an rawt a, unit khat hi 30 pawisain a pung dawn tihna a ni a. A punna tur hi a percentage-a lak chuan 6.74% a ni ang. Power & Electricity department sawi danin consumer-te eng pek nan hian chawhrualin unit khat zelah department chuan Rs. 8.75 a mamawh a, hetiang veka mipui an pek leh chuan mipui tan phurrit nasa tak an siam dawn avangin unit khat man hi Rs. 4.75 ni turin an rawt ta a ni. P&E department rawtna anga eng chhit/hman man hi tihsan a nih chuan kum 2017-2018 chhunga an sum hmuh belh tur chu Rs. vaibelchhe 11.23 niin an sawi a, kum 2017-18 chhunga eng chhit man atanga sum an hmuh tur zawng zawng chu Rs. vaibelchhe 177.37 niin an tarlang bawk. Power & Electricity department rawtna chungchangah hian power lama thuneitu sang Joint Electricity Regulatory Commission (JERC) for Manipur & Mizoram chuan sawisel duh leh rawtna neiduh te tan hun a hawng a, JERC hun hawn chhung January ni 27,2017 thleng khan pawl pahnih Mizoram Consumer Union leh PRISM chuan an duhloh thu an thlen. MCU chuan mi rethei zawkte dinhmun thlir chungin vantlang hman (domestic categories) leh mi rethei zual (Kurti Jyothi) te chu tisang ve lo turin an ngen a. PRISM pawhin mipui hnena power hralhna rate chu tihniam turin an ngen bawk. India rama power thuneitu sang Appellate Tribunal For Electricity (APTEL) chuan kumtin eng chhit/hman man hi ennawn thin turin state tinte chu a hriattir a, power hman man hi tisang emaw tihniam a, ennawn thin turin a hriattir a ni.