ZALEN October 21, 2024 : Vawiin Mizo Hnam Runah chhung inkhawm neih a ni a. Hun hnihna political session-a thusawitu MNF Vice President Lalchhandama Ralte, MLA (Leader of Opposition) chuan October ni 17, 2024-a power changtu Minister leh Assam Rifles (AR) indan buai chungchangah, “Engatinge tun thlenga Sawrkar a ngawih reng, hlauh an nei em ni?” a ti.

Opposition leader Lalchhandama Ralte chuan he thil thlengah hian MNF Legislature Party chuan buaina thlen tuk ni 18.10.2024 khan thuchhuah siamin AR-te chet dan an dem thu a sawi a. Congress leh BJP-te pawhin an dem thu an sawi bawk a nih kha, a ti.

“Democracy kan ni a, lndia ramah hian mipuite thlantlin an lal ber,” tiin, “2nd Bn. AR-ten minister an dang buai hi Armed Forces (Special Powers) Act, 1958 (AFSPA) hmanna ang maiin an duhna hmun hmuna check post an siam hi kan dem tak zet a. Hei hi MNF Legislature Party chuan kan dem tak zet tih kan sawi nawn a ni,” a ti.

"AR-te hi border-a duty tur an ni a, Zoram hmun lailiah check post siama an duty hi kan dem. Ngopa daia feh tur an dapte hi kan dem a. An chet dan hi a thinrim thlaka kan sawrkar pawh hi a in ennawn a ngai a ni," a ti bawk.

Chhantea chuan “He thil thleng hi hnam anga tanrualna hun atan hman kan beisei laiin khawnge kan Mizoram sawrkar hi? Engatinge vawiin thenga thuchhuah a la neih loh? He hnam humhim tur hian he sawrkar hi kan ring zui zel ang em?

“Minister 12 zinga pakhatin harsatna a tawk a, engatinge Chief Minister leh Home Minister-te hi an ngawih reng? Hlauh an ngah ta viau em ni? CM-in a tih tur nia ka hriat chu – AR hotu lu ber hi a rang a rangin a ko tur a ni a, Union Home Ministry-ah thlengin action la turin hma a la nghal tur a ni. Hetih laia an ngawi thei tlat hi, an ngeng a chhun lo em ni?"

“Kan ram leh hnam hian chhantu a ngai. Kha thil thleng kha hnam issue dik tak a ni. Power minister tawrhna hi kan tawrhpui em em laiin, ZPM sawrkar leh an party an ngawi tlat hian ngaihtuah loh tur thil tam tak min ngaihtuahtir phah. Mi thenkhatin AR hmuna party office tur an beisei tihte hi tak tak a nih ka ring ta hial a, tawng chhuah ngam loh chhan an nei niah ka ngai bawk,” a ti.

MNF Vice President chuan, “He thil thleng hi party dangte hian politics thilah kan la lo. Democracy leh mipui dikna chanvo tun din ni rawh se kan ti mai a ni. An Minister dang leh MLA dangte an ngawi tlat hi an party chhungkaw boruak that loh vang a ni em?,” a ti a.” He ram leh hnam hi a dinchhuah theih nan theihtawp i chhuah ang u,” tiin Zoram mipuite a sawm bawk a ni.