ZALEN October 20, 2024 : October 17, 2024-a Power Minister F. Rodingliana leh amah zuitute nena an buaina chungchangah Assam Rifles (AR) atanga thu dawn danin, chanchinbua report lang chu thil hriat dik tawk hriat loh vang leh AR-te tihhmingchhiat tumnaah an ngai tih an tarlang a, AR-ten minister leh a zuitute lirthei an tihdin chhan chu a lan dan ang ni lovin thil hriat sual vang niin an sawi.

AR chuan October 17 khan Mobile Vehicle Check Post (MVCP) chu Zokhawsang bulthutah an siam tih an sawi a, an thudawn bawhzuia venhimna lama an hmalakna a siam a nih thu an sawi.

“F. Rodingliana leh amah zuitu lirthei paliten checkpoint an paltlang lai hian minister lirthei hi dan ang thlapin kaltlangtir a ni a. Amaherawhchu, civil mite lirthei check a nih laiin amah zuitute hi an ding lui tlat a, AR-te chu minister leh a zuitute tiding angin an lang ta a ni,” an ti.

Minister thuih-hruaite zinga mi chet dan chu boruak punlun chhan pakhat niin AR hian an sawi a. Media report-ah Public Secretary to Minister chet dan chu tar lan a ni ve lo an ti a, “A lirthei a chhuahsan rualin a jacket a hlip a, AR duty-te chu tawngkamin a tawng nasa hle,” an ti.

Sipaite body camera pahnih a pawhthlaksak a, mi dang pawh mawi lo takin an che a, tawngkam mai lo tak chhakchhuakin ‘go back to India’ tih tawngkam te an hmang niin an sawi.

Video darh atanga a lan danin Minister staff te hian AR-te pawh electric power tihtawp sakah an vau tih chiang takin a lang a, Mizoram hmun hrang hranga an post-te chuan êng an hmuh that loh phah a ni, an ti.

AR chuan, “Minister convoy tibuai nia sawi hi thil dik lo langsar tak a ni. A nihna takah chuan convoy chu clear passage pek a ni a, convoy tihdin hi anmahni ngeiin an tihluih a ni. He thil thlenga video chuan convoy atanga lirthei pakhat chu tum reng vanga kawngpui dang tura dah luih a ni tih chiang takin a lang a, hei hi thil ti khawlhkhamtu a ni,” an ti.

“Kawlbem-a October 12-a thil thlengah khan AR duty pakhat Minister thu zawttu rui anga sawi hi puhna dik lo a ni. Sipai hian kum 20 chhung zet service record entawn tlak tak a nei a, sakhaw thil vangin zu in lo a ni. He thil thlen lai hian Minister convoy chu lirthei hmasa tlemte an kal pelh hnuah checkpoint-ah an ding a. Minister hian sipaite duty-te chu a hmachhawn a, checkpoint hi thiah vek tura tih tawh a nih thu a hrilh. Sipaite hian an hna an thawk tih an hriattir chuan Minister leh a thawktute chu an au chhuak a, escort-te chuan sipai chu an lirtheia hruai lut luiin a bul hnaia khaw pakhat thleng an phur a ni. Sipai hi tualchhung Commander a inrawlh hnua thil thleng chungchang a zawh hnuah chhuah a ni. Hei hi sipai pakhat hna a thawh theih lohna tur leh rawngbawltu inpe tak hming tihchhiat tumna a ni,” an ti.

Media thenkhat tarlan dan thenkhat chu, “AR sawichhiat tumna leh Minister-a thawktute chet dan dik lo ngaihvenna tihbo tumna a ni,” an ti a. He thil thlen hnuah hian Mizoram chhunga AR awmna hmun hrang hrangah power supply a chhiat phah a, operation neih tum a thuan­awp a, ramri hmun hrang hrangah venhimna a tihchhiat phah bawk tih an sawi.

AR chuan a kaihhnawih thuneitute chu power supply a rang taka pe leh turin a ngen a, “Mizoram puma sipai awmte nunphung pangngaia an awm theih nan hmalak a ni,” an ti bawk.