ZALEN July 13, 2026 : Power & Electricity (P&E) Department Minister F. Rodingliana hoin July 10, Zirtawpni khan Department official leh engineer-te nen Aizawl khawpui chhunga power supply tihchangtlunna tur chungchang an sawi ho va, Inrinni-a shutdown lak thin tih tlem theih dan tur an rel.

Thutkhawmah hian Aizawl khawpui pum huaptu 33 kV ring line siam zawh vek tumna hmalakna chu ngaihtuah a ni a. Hemi hna atan hian pawisa awm ang ang hmangin hmalak nghal turin an rel.

Chawnpui, Durtlang North leh MINECO area-ah power interruption awm fo thin tihreh nan Chawnpui Sub-Station thuamthat dan tur pawh sawi ho a ni a, a tul anga bawhzui nghal turin rel a ni.

Ruah sur laiin isolator chhia siamthat theih loh avanga current rei tak awm lo thin pumpelh nan circuit breaker zawng zawng siamthat vek leh isolator-te pawh indoor-ah dah a, control room atanga hnathawh theih tura ruahmanna siam a ni.

11 kV line-te a chawm thui lutuk tih tawi nan Aizawl hmun remchang hrang hrangah 11 kV Sub-Station siam belh leh line-te then tet tura ruahmanna siam a ni bawk. ABC (Aerial Bunch Cable) line earthing tha lo avanga line chhia awm thinte pawh earthing siamthatin tihreh tum a ni a, hun rei zawka chuan ABC line aiin cover conductor hmang tura hmalak pawh ngaihtuah a ni.

Teirei Hydel Project leh Tlungvel Solar Plant-te Department-in changtlung zawka enkawl dan turte ruahman a ni bawk a. Tuivai Hydel Project tihhlawhtlinna tur pawh phase thumah then darhin a tahtawl zawka hmalak dan tur rel a ni.

Meeting-ah hian P&E Department Commissioner & Secretary K. Lalrinzuali, Chief Engineer Er. Ngursailova Sailo leh Department official pawimawh dangte an tel.