Czech thuneitute chuan Prague university-a silai hmeh puahah mi 10 an thi a, ‘thahnem takin’ hliam an tuar bawk tih an sawi.

Police chuan khawpui laili, Jan Palach Square-a Charles University beihnaah hian silai hmet puaktu hi ‘dah that’ a ni tawh tih an sawi.

Prime Minister Petr Fiala chuan ‘thil lungchhiatthlak tak’ an tawn lai hian a tih tur chhawp sate a thulh nghal tih a puang.

University-a thawktute chu an awm hmun chhuahsan lo tur leh an pindanah inkhunga êng pawh tithim tura tih an nih thu Reuters chuan a tar lang.

Thil thlenna bul lawka lo awm, British-Australian Targ Patience chuan ‘vawi tam tak’ silai puak thawm a hriat thu a sawi.

“Ka va dak chhuak a, police an lo thleng a. Officer-te hi thil thlenna hmun pan khawmte lo buaipuiin an buai hle a ni,” a ti.

Thlalak darhah chuan university hungna pawn lama lawn te leh inkokichhuana a chhung lam en tum pawh an awm tih a hmuh theih.

Zirlaite chuan an classroom-ah khung an ni a, chhuak lo tura tih an nih thu an sawi hlawm.

“Tunah hian Prague-a kan classroom-ah ka tang,” tiin zirlai pakhat, Jakub Weizman chuan X-ah a tar lang nghe nghe.

Thuneitute chuan square leh university chhehvel kawtthler eng emaw zat khar a ni tih an sawi.

Charles University hi Prague-a Old Town-a awm a ni a, khualzinte hiptu, lei hlui tawh tak, Charles Bridge atanga metre 500 chauh a ni.