Aizawl November 8, 2022 : Synfo leh Central KTP thawk dun buatsaih Branck KTP mal zai intihsiakna Praise On 2022 chu a hmawr bawk a hnai ta hle a, finalist mi 10 te chu zanin hian a zan khatna atan an intihsiak dawn.

September ni 26, 2022 atanga neih tan 'Praise on 2022' hi a hmawr bawk a hnai ta hle a, mi 300 chuang atanga Judge te thlitfimna paltlang mi 10 te chu zanin leh November ni 17-ah te an intihsiak dawn a, November ni 18 zanah result puan a ni ang. Pakhatna dinhmun hauha Rs 100000 dawng tu tur hriat teuh tawh hle.

Praise on 2022 hi hmun hrang hrangah neih thin a ni a, final round hi Mission Vengthlang Presbyterian Kohhran-in an thleng dawn a, show hi Golden Jubilee Hall-ah neih a ni ang.

Top 10 te inelna zai hi live music hmangin house band ten an rem tawh dawn a, musician te hi dai hriat ngah tak tak an ni.

Praise on 2022 intihsiak lai hi Live-in Hruaina eng channel leh Synfo Youtube channel-ah te pek chhuah thin a ni a, final round hi zan dar 7:30-ah te Live in pek chhuah leh a ni ang.

Top 10-a in hlang kai te hi an zaithiam tlang tawh em em a, zaninah Kristian Hal bua an hla duh ber an sa ang. 

Praise on 2022 finalist te chu :

1. Lalramnunmawii

Aw control thiam tak Mawitei hi Durtlang pastor bial zaipawl member nilai a ni a, judge ten 'I zai puitling' an tih thin a ni.  A aw control kual velin ngainat leh thiam tih a hlawh a, Judge zinga mi Mavuana pawhin, "I zai hi, i aw in min ko an tih tur ang chi hi a ni," a ti hial, social media lamah a tantute thawm a ring hle.

2. Lalhriatkimi

Kimkimi hian a thiam kim hle a, Musical instrument khawih thiam deuh vek. Kolasib Diakkawn nula hian second round-ah khan 'Ka beisei Isua' tih hla sain, keyboard hmangin a zai a rem a, mipui ngaihven a hlawh phah hle. Kum 5 mi a nih atangin mipui hmaah a zai tan a, sunday sikul atanga bultanin branch KTP programe hrang hrangah zai chho zelin, kum 2013-a CZS Kolasib-in solo competition a buatsaihah khan pahnihna a ni. 

3. R. Lalnuntluangi

Tluang Tluangi hi Laipuitlang, Aizawla cheng niin, kum 5 mi a nih atangin sunday sikul-ah a zai tan a, a school luhnaah te pawh zai fo mahse, tuntum hi zai inelnaa a tel vawikhatna a ni thung. A aw mil tur hla a thlang thiam hle a, elimination round atanga top 20 round inkarah Genre hrang hrang hrut kualin, Jazz lam a inhmeh zual bik emaw tih tur a ni. Judge te'n "I aw ri hian min hneh a, aw tone mawi tak nei i ni a, a hmul thep a, a tham deuh bawk si," tia an fak thin a ni.

4. R. Lalmuanpuia

Aw thunun hneh, aw thlep kual vel thiam Rengdil tlangval Muanpuia hi rimawi khawvelah a mikhual lo a,  LPS vision production-in kum 2019-a 'Youth Icon' an buatsaihah khan top 50 thleng a inhlangkai tawh. Tuntumah hian Top 20 round-ah khan Lalruatfeli (Maipuii) hla phuah leh sak lar 'Trinity' sain, a thiam hle a; judge te pawhin a hla sak chu an huphurhpui aia a sakthat thu an sawi chhuak hial. R&B lam a thiamnal bik deuha ngaih ni mahse, genre dang hymn, country leh soul lam pawh a thiam em em tho bawk.

5. Malsawmdawngzuali

Judge te'n "Aw pui taka zai hem hem chi" tia an fak thin Tlangnuam West branch KTP member Mali hi Praise On-ah hian mikhual a ni lo a, kum 2016-ah khan a lo tel tawh. Top 20 round-ah khan Kristian Hlabu 132 na 'Enge ka rilru a mangan' tih hla a sa a, judge te lung a dum hle a nih kha. Judge zing ami Zothanmawia'n 'I zai a ngaihnawm, Isua pawh a lawm ka ring," tiin a fak hial. Beginners department zirlai a nih atangin mipui hmaah a zai tan a, Zoram mipuiin a zai kan la ngainat chhoh zel a rinawm.

6. Gloria Laldinsangi

Intihsiakna neih a niha Gloria-i a rawn lanin thawm a awm hak zel, an branch ten an tawiawm tha a; a zai ngainatu an tam. Dawrpui Vengthar nula Gloria hi Beginners department zirlai a nih atangin mipui hmaah a zai tan a, zai intihsiaknaah erawh tuntum hi a vawikhat telna a ni. Judge ten "Nang hi chu 'Artist' i ni" an tih hian lem ziah a tui a, rimawi hmanrua Guitar leh Keyboard a tum thiam bawk a. Gloria hi a aw a danglam a, aw tlanglawn lo tak mai nei a ni.

7. Jessica Lalhmangaihtluangi

Mizoram chhim lam atanga Praise On 2022 top 10-a inhlangkai awmchhun Jessica-i hi Lunglawn, Lunglei-a cheng niin, Lunglei Chanmari pastor bial zaipawl member nilai a ni. 'A zai nung' tia sawi thin niin, Judge zing ami Stacy-i'n "I zaiah hian tinungtu a awm tlat thin, min ti kang tlat zel," tiin a comment hial. Top 20 round-ah khan 'No longer a slave to fear' tih hla Mizo tawnga lehlin a sa a, a aw danglam mawi tak nen a hla thlan hi a inhmeh hle. Round a san chhoh zel angin a zai pawh a tha chho telh telh a, hmasawn ber te zinga mi a ni.

8. Isaac Lalthazuala

'Saka' tia an koh, Chanmari West Hmar Veng tlangval hi Primary department zirlai a nih laiin group singing-ah telh a ni a, kum 2015 atangin a malin a zai tan. Chanmari West pastor bial zaipawl-ah tel mekin, tenor part a sa. Top 20 round-ah khan music track nen zaiin, 'Joyful Joyful we adore thee' tih hla Mizo tawnga lehlin a sa a, a zai zawha Judge ten an sawizuinaah Satcy-i'n intihsiaknaa tel ve dang te aia a danglamna hrilhin, "Soul hran hi i nei a, chu chu midang laka i danglamna," tiin. Saka hi musical man tak a ni a, head voice a hmang thiamin, a ngaihnawm thin hle.

9. R. Remsangpuia

'Gospel Rocker' tia koh fiam, Rsp-a hi Chanmari West Branch KTP-a Group office bearer nilai a ni a. Mizorama band contest ngaihhlut hlawh takah te pawh an Band-in pakhatna dinhmun an lo luah tawh a, rimawi khawvelah mikhual a ni lo. Mipa aw lian tha tak, zai hluah hluah thin a ni. A zaithiam piahlamah a stage perfomance chu Judge te duh rawn chhan a ni. A thiante nena band an dinah lo zai fo tawh thin mahse, mal zaia inelna erawh a la hmachhawn tam lo thung. 

10. Vesper Lalrinawma

KTP Saitual branch-a committee member nilai, bial zaipawla tel mek Vesper-a hi Gospel band tha tak 'Fall Profane' vocalist a ni. Top 20 round-ah khan Israel-a Pachuau hla 'Krista tan' tih hla a sa a, a ngaihnawm teh e. 'Gospel Rocker' tia sawi theih tho Vesper-a hi a aw a danglam mawi em em a, judge ten comment an pek pawhin 'a aw danglam na' an sawi chhuak thin, Stacy-i chuan,"I aw i sawizawi hneh lutuk hian min hneh," tiin a fak hial.