KTP member-te tana buatsaih malzai intihsiakna 'Praise On 2022' neih mek a ni a, Thawhlehni zan atang khan top 50 intihsiak neih tan a ni. Top 50 round hi Republic Veng Presbyterian Kohhran Hall-ah neih mek a ni a, a zan hmasa berah mi 19 an in lan a, music track nena zai an ni tawh bawk a, mipui beng an ti tlai hle.

Top 50 round hi Ningani zan leh Zirtawpni zanah neih chhunzawm a ni leh dawn a, top 50 round bika zan hnuhnung ber Zirtawpni zanah top 20-a in hlang kaite hming puan a ni nghal bawk ang. 

Elimination round-a in lan mi 379 zinga a tha zual mi 50 thlan chhuahah hian a tam zawk chu Aizawl khawpui chhung Branch te an ni a, mi 14 te erawh Aizawl pawn atanga tel an ni thung.

Top 50-a in hlangkai zingah hian Mizo Idol, Youth Icon leh zai intihsiakna lian thama lo tel tawh leh stage sang zawkte pawh lo thleng tawh te an awm nawk a ni.

 Elimination round atang khan intihsiak lai hi TV leh Youtube lamah live-a pek chhuah thin a ni a, Hruaina Eng channel leh SYNFO Youtube channel-ah te pek chhuah thin a ni. 

Top 50 round tan a nih hnuah phei chuan TV leh YouTube lamah entu an pung chho hle. 

Judge te hi rimawi lama tawn hriat ngah leh hriat lar tak te an ni a, Synod Choir conductor lo ni tawh, music zirnain neia mi hriat hlawh tak Upa Zothanmawia, Khatla te, Synod Choir conductor hlui tho, Upa C. Vanlalvuana, Chanmari leh Gospel singer hriat hlawh, Mizo hmeichhe zinga rimawi khawvela tawn hriat ngah Stacy V.L Muanpuii, Tuikual te an ni.

'

Praise On 2022' buatisah tute'n ruahmanna an siam danin, tunkarah top 50 round neih zawh a ni ang a, a tha zual 20 te chu October 27-29, 2022-ah Chaltlang Presbyterian Kohhran Hall-ah intihsiakna an nei leh ang. Top 10-a tling te'n November 8 leh 17-ah intihsiakna an nei leh ang a, November 18 zanah result puan a ni ang.