Synod information & Publicity (SYNFO) leh Central KTP buatsaihin 'Praise On' malzai intihsiak a awm leh dawn a, September-ah tan a ni ang. Hmun pasarihah elimination round neih a ni dawn a, Kolasib atangin bul tan a ni ang. 

Praise On 2022 elimination round hi September 26, 2022 khian Kolasib Diakkawn Kohhranah neih tan a ni ang a, Lunglei leh Mamit ten a zui ang. Serchhip Kawnpui Kohhranah chhunzawm a ni ang a, Chhamphai zawhah Aizawl khawpui chhung kohhran pahnih Tuikhuahtlang leh Ramhlun Vengchhak ten an thleng ve leh dawn a ni. 

Praise On hi mal zai leh group zai hmangtein neih a lo ni tawh a, kum 2017 khan group zai hmangin intihsiakna hi neih a ni. Mal zai bikah hian - Arini, Cindy leh Zorina Sailo te chu tun thlenga Zoram mipuiin kan hmelhriat zui takte an ni a, kuminah pawh hian zaithiam tha tak tak an rawn chhuak lehin a rinawm.

SYNFO leh CKTP te hian tun hnai khan meeting an nei a, ruahmanna hrang hrangte an sawiho. Endiktu tur lam pawh an inruat tawh a, mahse official-a puanzar a la ni lo thung.