Aizawl: December 2022 atangin Mizoramah pre paid smart meter hman tum ni mah se hman theih a la ni lo a, Power & Electricity Department chu meter thar hmang tur hian an inbuatsaih mek.

ZALEN-in Mizoram Power & Electricity Department thawktute hnen atanga thu a dawn danin pre paid smart meter enkawl leh buaipui hna (service provider) thawk tur hian tender pawh chhuah a ni tawh a, chhangtu pawh an awm a. Mahse, rate chungchang leh thil dangah sawi fel ngai neuh neuh a la awm avangin a buaipuitu tur pawh tihfel a la ni lo tih an sawi a. Mizoram ruala smart pre paid meter hmang tura tih state dangte pawhin an la hmang thei lo tih sawiin thil thar anih avangin hmanhmawh vut vut a harsa niin an sawi bawk. 

ZALEN zawhna chhangin Power & Electricity department thawktute chuan Mizoramah êng chhitu chhungkua (consumer) mi 29,000 atanga 30,000 inkar vel an awm tih sawiin heng mite hi meter thar vuahsak vek an ni dawn tih an sawi.

“Meter thar vuahna man hi consumer pakhat zelah Rs. 6,000 vel ni tura ngaih a ni a, meter man 22.5% (Rs. 1350) hi central-in a tum dawn a. A bak zawng hi kum 10 chhung zawi zawia rulh tur a ni,” an ti a. Pre paid smart meter hman a nih hun chuan mipuiten sum an seng tlem dawn tih leh top up thun chu a har lo tih an sawi bawk.

Sawrkar laipui hmalaknain Revamped Distribution Sector Scheme hnuaiah consumer meter zawng zawngte hi pre­paid smart meter-a thlak vek tura tih a ni a. India ram state pariat - Jammu & Kashmir, HP, Maharastra, UP, MP, Gujarat, Puducherry leh Mizoram ah te a bultanna atan hman tum a ni.