Premier League 2022-23 season chu a liam ta a, thil thlengte chu kan hmu vek a, a hria leh hria inhrilh nawn kan ngai hlawm lo. 

A phek lehlam kan sawi ve thung ang a, ngaihven leh langsar si lo a phena ngaihnawm kan phawrh ve dawn thung.

Season liam ta ang reng renga manager insiksawi kual nasat kha a la awm ngai meuh lo va; VAR-in hnialna a siam tam a, player lei tamin awmzia a nei em tih pawh sawi zui tham a ni.

Manager 39!
Season liam ta anga manager siksawi nasat kha a awm lo hial mai thei a, manager 14 zet inthlak kual an awm a. Chelsea, Leeds leh Southampton phei chuan pahnih an bân hman vek.

Caretaker leh interim atana rawih zawng zawng nen manager chanvo chelh mi 39 an awm hman.

Premier League team 20 zinga pakua chauhvin season tanpuitu an hmang tluan.

Tlahniam ta pathum - Leicester, Leeds leh Southampton ten a tawp dawnah manager an la thar theuh va, an tlak rualin an chawlhsan nghal vek bawk.

Chelsea che chhia
Chelsea tan 2022-23 season hi hriat reng hlawh tawh tur a ni a; mahse, a tha zawng a ni lo thung.

Blues hi 12-naah a tawp kharin 1995-96 hnua season an khar chhiat ber a ni a; mahse, hei hi chu an chanchin duhawm lova a zahve ang vel chauh a ni.

Season hmasa tawpa Todd Boehly-a’n a lak hnuah £ maktaduai 583 zetin player an la lut a, a lailawka an chhawr nen manager pali lai an hrawn hman bawk.

January-ah £ maktaduai 300 sengin nipuiah £ maktaduai 270 an seng bawk a, kum 2019 nipuia Real Madrid-in £ maktaduai 292 an sen nen tum khat bazara inseng hnem pathum zinga pahnih an hauh.

Boehly-a’n Champions League nomawi lakpuitu Thomas Tuchel bânin kum nga chhung atan Potter a la lut a, a coaching staff-te nen thla sarih hnua an chhuahtir leh meuh chuan zangnadawmna £ maktaduai 21 zet a sen belh phah.

Potter-a thachhangdawltu, Bruno Saltor-a’n a ai a awh lailawk zawk a, vawi khat chiah a khelhpui hnuah Frank Lampard an ko kir a; mahse, vawi 11 a khelhpuiah vawi khat chiah hnehna a chanpui.

Nipuia Tuchel-a’n a lak luh, Champions League group stage-a bul a tantir vek, Pierre-Emerick Aubameyang bakah Benoit Badiashile, Noni Madueke, David Datro Fofana leh Andrey Santos te chu January-a an lak luh tharte avangin knockout stage-a an squad-ah chuan telh loh hial an ni.

2022-23 chhunga £ maktaduai 168 zeta an lei - Aubameyang, Badiashile, Mykhaylo Mudryk, Madueke, Carney Chukwuemeka leh Fofana te chuan Chelsea kawr hain minute 1,000 an khel tling lo vek.

Bazar nasa Forest
Anni hian player 29 zet an la lut a, 2021-22 Championship promotion squad tam zawk an thlauh thlak phah.

Bazar inhawnah pawh duhtawk mai lovin September leh February thlengin a thlawna lak theih chenin an la.

Hetih lai hian manager thlak 14 zingah mak tak maiin Steve Cooper a tel lo hlauh thung a. Vawi riat khelhah Forest chu a hniam berah awmpuiin an bân mai dawn emaw tih laiin contract thar a ziak hlauh.

April pawh khan chawlhtir a ni dawn tih sawi a awm leh a; mahse, club chuan an chhawr zui dawn tih an sawi leh.

A tawpah an player lei leh manager an rintlak rah an seng tia sawi theih a ni a, an him a, an hnuaia team li awmten manager an thlak vek thung.

Him tura inbeihna a pui
Tun season anga tlakhniam hlauva inbeihna nasa hi a tam bik kher lo vang.

March 31-ah khan a hnuai lam club pakuate inthlauhna chu point li chiah a ni a, hetih lai hian khelh 10 leh 11 chauh a awm tawh a. 12-naa awm Crystal Palace-in point 27 an neih laiin a mawnga awm Southampton-in 23 an nei bawk.

Southampton pawh an tang tang tang a, 2017-18 season hnua a vawi khat nan inkhel vawi 35-na a zawh thlengin tumah tla an la awm lo.

Tlahniam pathum zinga pahnihin March thla khan manager an thlak ve ve a. Leicester-in Dean Smith an la a, Leeds-in Sam Allardyce lam hawiin an him chuan bonus pek an intiam a, an pawisa an hum thei dawn ta thung.

Sawi hlawh VAR
Referee-te pawl, PGMOL chuan tun season aia video assistant referee tihsual vanga ngaihdam dilna an siam tam a la awm lo.

February khan Brighton leh Arsenal lakah ngaihdam an dil a. September khan VAR-in Newcastle leh West Ham te goal thun a pawmsak loh avangin ngaihdam an dil bawk.

Inkhel vawi 30 a zawh khan VAR hian tihdik loh 10 a nei a, inrawlhna tura inrawlh loh 19 a nei a, khelmuala tihsual 30 a nei bawk.

Season a tawp rual khan PGMOL chief Howard Webb chuan Sky Sports leh BBC Radio 5 Live-ah tihsual tam tak an neihah ngaihdam a dil bawk.