Season liamta 2021/22 Premier League-a an champion zan khan Manchester City chuan an  supporter-te thunun zo lovin mual chhungah mi eng emaw zat an tlan lut a, kha thil thleng avang khan £260,000 chawi tura tih an ni.

City hian an mualah season liam taa an match hnuhnung ber kha khelin  Aston Villa an hmachhawn a, an chak zo dawn lo emaw tih hnuah second half minute nga chhung lekin goal thum an khung vangin Aston Villa lakah chakna changin an mualah ngei an champion nopui an chawi. 

Kum nga chhunga club-in title an lak vawi lina lawmin supporter sang tam tak khelmual chhungah an tlan lut a, khelmual chhunga lut lo tura ngenna club-in a siam pawhin ngaihpawhmawh a hlawh zo lo. 

He thilthleng avang hian City chu FA Rule E20 bawhchhiain thiam loh chantir an ni a, independent regulatory commission chuan hremna hi a pe ta a ni.    

Zirtawpni a The Football Association thuchhuah chuan,"May ni 22, 2022 Premier League-a Aston Villa FC nen an inkhelh ṭum khan  FA Rule E20 an bawhchhiat avangin an hun lo kal zel turah pawh fimkhur turin an chah," a ni.