ZALEN, Dec. 02, 2024: Season thar hawn nana Cricket Association of Mizoram (CAM)-in a buatsaih thin, President’s Cup 2024–25 champion chu Chhinga Veng Cricket Club an ni ta a. Final-ah hian Chanmarians Cricket Club lakah super over-ah run khatin hnehna an chang hram.

Champion club hian a vawm lamah tha taka bul tanin tun tournament-a run siam tam ber, Chanmarians batter tha Lalhruaizela meuh pawh an dah tha hmak thei a. A tawp super over-a chak zawk zawnnaah run vaw chhuak hnem zawk ni leh bawkin nomawi an hawn.

Suaka Cricket Ground, Sihhmuia Thawhtannia club hlun pahnih final hi an inhnehtawk hle a. Thumvawra chak, Chanmarians-in vuak hmasak an thlang a, bul an tan fuh lo.

Hruaizela chesualin run ruk chiah a vaw chhuak a, wicket keeper Karan Chhetry (run 21) leh captain Lalnunkima Varte (run 12) te zarah over 20 chhungin run 61 an tlin hram chauh va, an thi kim hman chiah bawk.

Chanmarians hian Chhinga Veng bowler-te an ngam lo a tih thei a. Tun tournament-a bowler hlauhawm ber pawl, Man of the Match-a thlan zui, B.Lalnunfela chuan an batter pali a vawm hlumsak a. Captain Lalchhandama Sailo-in tha taka thlawpin wicket hnih lain run thum chiah an vuak chhuahsak thei a, over hnih phei chu run a pe lo.

Chhinga Veng pawhin an vaw tha bik lo va, opener-te an insawh ngheh hmaa thiin Moses Ramhlunmawia (run 16) leh William Rinawma Pachau (run 13) zarah run 61 chiah an tlin ve hman tho va, mi pariat an thi.

Run vuak chhuah zat a inan chiah avangin super over hmanga chak zawk zawn a ni zui a, Chhinga Vengin run 12 an vuak chhuah chu Chanmarians hian run khatin an phak ta lo va, vawm thata bul tantuin a tawpah vuak thata kharin nomawi an hawn thei ta a ni.

President’s Cup hi CAM hnuaia club leh district cricket association zawng zawngte khelh theih niin kuminah hian tel tura beisei team 60 atangin 54 an inlan thei.

Kuminah hian Hruaizela chu final-ah che tha lovin a team chanpion-pui zo lo mah se mi mal chawimawina pahnih, Player of the Tournament leh Best Batsman atan thlan a ni a. Chanmarians batter hian vawi nga a khelhah run 222 a vaw chhuak a, khelh khata run 55.50 vaw chhuak zel ang a ni.

Best Bowler atana champion team bowler Lalruatdika thlan a ni bawk a. Ani hian khelh ngaah wicket 10 a la a, over khat a vawma run 3.10 zel pe ang a ni.