ZALEN, Nov. 25, 2024: Cricket Association of Mizoram (CAM)-in season khuhhawn nana kum tina a buatsaih thin, President’s Cup chu khelh chhunzawm zel niin tunah chuan club pariat chiah an dam tawh a, Thawhlehni atang hian quarterfinal khelh a ni ang.

Season khuhhawnna tournament hi CAM hnuaia club leh district cricket association zawng zawngte tana khelh theih niin CAM-in khelmual a neih chhun, Suaka Cricket Ground, Sihhmuiah October 28, 2024 atanga khelh tan kha a ni.

Kuminah hian team chhuak tura beisei 60 atangin 54 an chhuak thei a, an zinga 46 zet chu tla tawhin tunah chuan a thiam zual club pariat chiah an awm tawh.

Thawhlehni atanga semifinal luh inchuhna inkhel tan turah a hmasa berah champion lai, Kulikawn Cricket Club leh Ainawn Vêng Pacers Cricket Club an hmachhawn ang. 

President’s Cup-ah hi Twenty20 format-a khelh niin inkhel 47 a awm tawh a, run 8,800 zet vuak chhuah tawh niin half-century siam mi 19 leh century vaw chhuak mi pathum an awm tawh.

Kumina club/district association 54 inlan zinga hian district association panga bakah Aizawl khawpui pawna club awm pali – Sihphir Cricket Club, Sairang Cricket Club, Sihhmui Cricket Club leh Thingsulthliah Cricket Club te an tel thei vek a ni.

Ruahhman dan chuan final hi December 2, 2024-a khelh tum a ni.