ZALEN, Nov. 30, 2024: Cricket Association of Mizoram (CAM)-in season khuhhawn nana kum tina a buatsaih thin, President’s Cup final-ah Chhinga Veng Cricket Club leh Chanmarians Cricket Club an inhmachhawn dawn ta.

Final hi Thawhtanni hian Suaka Cricket Ground, Sihhmuia khelh a ni dawn a, semifinal hnuhnung zawkah Inrinni khan Chanmarians hian Ramhlun Venglai Cricket Club chu wicket ruka hnehin final an lut a ni.

Semifinal-ah hian Ramhlun Venglai hi thumvawrah chakin vuak hmasak an thlang a. Over 20 chhungin Lalhmachhuana run 43 vuak chhuah nen mi panga thiin run 127 an tlin.

Chanmarians hian chak tura an mamawh chu mi pali chauh thiin ball sarih hmang bângin an umphak a. Man of the Match-a thlan phu takin ball 39 lek a hmachhawnah Lalhruaizela chuan run 75 vaw chhuakin an chakna bulpui a ni.

Semifnal hmasa zawkah Chhinga Veng hian Zirtawpni khan champion lai, Kulikawn Cricket Club chu an lo vaw thla tawh bawk.

Kulikawn hian an batter pathum ve ve vawm hlumtu, Moses Ramhlunmawia leh Lalruatdika te an ngam lo hle a. Moses-a phei chu over thum a vawmah run nga chiah an vuak chhuahsak thei.

Final-a inhmachhawn tur pahnih hi Mizorama club-ah chuan a hlun ber pawl ve ve an ni a; champion lai vaw tlatu leh Mizorama cricket hmunpui tia sawi ngam vaw tlatu an insu dawn tihna a ni. 

President’s Cup hi CAM hnuaia club leh district cricket association zawng zawngte khelh theih niin kuminah hian tel tura beisei team 60 atangin 54 an inlan thei.