ZALEN, Nov. 28, 2024: Cricket Association of Mizoram (CAM)-in season khuhhawn nana kum tina a buatsaih thin, President’s Cup khelh mekah club pali chiah an dam ta a, Zirtawpni hian semifinal khelh a ni dawn.

Suaka Cricket Ground, Sihhmuia semifnal hmasa zawkah champion lai, Kulikawn Cricket Club leh Chhinga Veng Cricket Club an inkhel ang a, chawhnuah Chanmarians Cricket Club leh Ramhlun Venglai Cricket Club an inkhel ve thung ang.

Quarterfinal-ah Kulikawn hian Saidingliana Sailo half century vuak chhuah leh Lalramnunsiama’n run kua chiah pea mi pali a vawm hlum chhawrin Thawhlehni khan Ainawn Veng Pacers Cricket Club chu wicket riatin an hneh. 

An hmachhawn tur, Chhinga Veng hian Mizoram club hlun ber zinga mi, Zarkawt Lord's Cricket Club chu Nilaini khan run 47-in an hneh ve thung.

Semifinal hnuhnung zawka inlan tur, Chanmarians hian Thawhlehni khan Thuampui Chinari Cricket Club chu rum 78-in an hneh a. Lalhruaizela leh Rohan Chowdhury te half century vuak chhuah zarah over 20 chhungin run 197 an tlin a, hemi an umnaah Thuampui tan Sahil Sharma chuan run 76 zet vaw chhuak ve mah se an batter paruk zet vawm hlumtu, Chanmarians bowler TC Laledenthara an ngam ngang lo.

Chanmarians hmaa ding tur, Ramhlun Venglai hi Mizoram cricket hmunpui tia chhal ngam an ni a. Semifinal luh inchuhnaah Nilaini khan run 120 zetin Venghnuai Raider Cricket Club an hneh.

Ramhlun Venglai hian Vanlalhruaitluanga run 79 vaw chhuak nen over 20-ah run 166 an tlin thei a. Venghnuai hian an umnaah wicket li laa run 15 chiah petu, Lalrinfela Zadeng an ngam lo va, an batter zinga che tha ber, Raj Kumar Chhetri pawhin run 20 chiah tlin hmanin over 13.1 lekah run 47 chauh tlinin an thi fai vek a ni.

President’s Cup hi CAM hnuaia club leh district cricket association zawng zawngte khelh theih niin kuminah hian tel tura beisei team 60 atangin 54 an inlan thei.

Ruahman dan chuan Zirtawpni inkhel pahniha chak zawkte hian Thawhtanniah Sihhmui khelmualah final an khel dawn a ni.