ZALEN November 25, 2024 : Vawiin (Thawhtanni) atanga tan Parliament thlasik thutkhawm inbuatsaihna All Parliamentary Leaders Meeting nimin Pathianni a neih ah Mizoram Rajya Sabha MP K.Vanlalvena chuan thu sawiin Manipur buaina tihtawpna atan President's Rule a dah tul a tih thu a sawi chhuak.

Vena chuan Mizoram MP ni chunga Manipur chungchang a sawi leh thin chu member dangte hriatthiamna a ngen thu sawiin British lo luh hma atanga Mizo hnahthlak hnam hrang hrang te Manipur-a an chen tawh thu leh tunah pawh Mizo hnam peng hrang hrang nuaih ruk chuang Manipur-a an chen mek avanga an harsatna te chu sawi chhuak thin a nih thu a sawi a. Nikum May thla atanga tun thlengin pawisawilo nunna tamtak a luan ral tawh thu leh Manipur-ah Central sawrkar in direct-a hma a lak theih nan President's Rule a dah chu hna pawimawh hmasa nia a hriat thu a sawi bawk.

Mizoram chhehvel ram Myanmar-ah leh Bangladesh Chittagong Hill ah te inkahna a la awm reng thute sawi chhuakin, raltlan mi tamtak Mizoramah an awm mek avangin chung hote zingah chuan naupang enkawl ngai tam tak an awm thu a sawi a. Shillong leh Guwahati a UNICEF awm te chu an tangkai phak loh avangin Mizoram ah ngei UNICEF office din a nih theih nana hma la turin Central sawrkar a ngen thu a sawi chhuak bawk.